बंगळुरू : महान्यूज लाईव्ह
घटना आहे कर्नाटकातल्या बंगळूरू येथील शहरातील. प्रसिद्ध जीटी मॉल मध्ये एक शेतकरी त्याच्या मुलासह गेला होता. शेतकऱ्याने परिधान केलेले धोतर मॉल च्या कर्मचाऱ्यांना खटकले आणि मॉलमध्ये प्रवेश करण्याचे तिकीट असूनही या शेतकऱ्याला आणि त्याच्या मुलाला प्रवेश नाकारला. त्यानंतर जो गदारोळ उठला. त्यामुळे सरकारला सुद्धा दखल घ्यावी लागली.
राज्यातील शेतकरी संघटनांनी आवाज उठवत या शेतकऱ्याचा आवाज मोठा केला आणि कर्नाटकातील सिद्धरामय्या सरकारने तातडीने याची दखल घेत जीटी मॉल सात दिवस बंद ठेवला. दरम्यान ज्या कर्मचाऱ्यांनी या मुलाला आणि त्याच्या वरल शेतकऱ्याला प्रवेश नाकारला त्यांचे निलंबन करण्यात आल्याची माहिती सरकारच्या वतीने देण्यात आली. त्यानंतर बेंगळुरू महापालिकेने संबंधित मॉलच्या कर्मचाऱ्यांना तातडीने निलंबित केले.
बेंगळूरु येथील नोकरदार युवक नागराज हा त्याच्या ७० वर्षीय वृद्ध शेतकरी वडिल फकिरप्पा यांना चित्रपट पाहण्यासाठी घेऊन गेला होता. या मॉलमध्ये प्रवेश करण्याचे तिकीट त्यांच्याकडे होते. मात्र शेतकऱ्याच्या वेशभूषेवरून मॉलच्या कर्मचाऱ्यांनी त्यांना आतमध्ये येऊ दिले नाही. अखेर मॉल बाहेर उभे राहून या मुलाने याचा व्हिडिओ तयार केला आणि तो सोशल मीडियावर अपलोड केला. यामध्ये या मॉलच्या कर्मचाऱ्यांविरोधात व व्यवस्थापनाविरोधात त्यांनी गंभीर आरोप केले होते. केवळ धोतर नेसले म्हणून आम्हाला प्रवेश नकारला असा यामध्ये विषय होता.
यामुळे मोठा वाद निर्माण झाला आणि शेतकरी संघटनांनी याबद्दल आंदोलने केली. हा मुद्दा कर्नाटकच्या विधानसभा अधिवेशनातही उपस्थित झाला. कर्नाटकचे मंत्री विरथी सुरेश यांनी मॉल व्यवस्थापनाविरोधात कडक कारवाई करू असे आश्वासन दिले. मात्र यावर विरोधकांचे समाधान झाले नाही. त्यामुळे तातडीने हा मॉल सात दिवस बंद ठेवण्याचे आदेश देण्यात आले.
