बेकायदा होर्डिंग्जवर दौंड ला अद्याप ठोस कारवाई नाही! एकही होर्डिंग काढले नाही! प्रशासनाचा हलगर्जीपणा आणखी बळी घेण्याची वाट पाहते काय?
राजेंद्र झेंडे, महान्यूज लाईव्ह
दौंड : दौंड शहरासह तालुक्यातील रस्त्यालगत उभ्या असलेल्या भल्या मोठ्या लोखंडी बेकायदा होर्डिंग्जवर अद्यापपर्यंत ठोस कारवाई नाही, एकही बेकायदा होर्डिंग काढले नाही. संबंधित मालकांवर ठोस अशी कारवाई केली गेली नाही. प्रशासनाचा हा हलगर्जीपणा कोणाचा बळी गेल्यावरच सुधारणार का? असा सवाल आता उपस्थित होत आहे.
काही दिवसांपूर्वी मुंबई येथे बेकायदा होर्डिंग पडल्याने जीवितहानीची दुर्घटना घडली होती. या घटनेनंतर पुणे जिल्हाधिकारी डॉ. सुहास दिवसे यांनी जिल्ह्यातील तहसीलदार, पंचायत समिती, सार्वजनिक बांधकाम विभाग तसेच संबंधित विभागाच्या अधिकाऱ्यांना आपापल्या कार्यक्षेत्रातील जाहिरातीसाठी लावण्यात आलेल्या बेकायदा लोखंडी होर्डिंग वर तातडीने कारवाई करावी असा आदेश दिले होते.
मात्र जिल्हाधिकारी यांच्या आदेशाला तालुका आणि स्थानिक प्रशासनाने केराची टोपली दाखवली असल्याचे चित्र आहे. दौंड पंचायत समितीचे गटविकास अधिकारी प्रशांत काळे यांनी ग्रामपंचायत हद्दीतील तब्बल ५९ बेकायदा होर्डिंग धारकांना नोटीस बजावून पंधरा दिवसांच्या आत परवानगी घेतली आहे का? आवश्यक कागदपत्रे सादर करा, स्वतःहून हे होर्डींग्ज काढावे, पंधरा दिवसांच्या आत न काढल्यास कायदेशीर कारवाई केली जाईल. अशी नोटीस बजावली होती.
नोटीस बजावून २५ दिवसांचा कालावधी उलटला, अद्यापपर्यंत एकाही बेकायदा होर्डिंग धारकांवर कारवाई केली नाही. उलट या होर्डींग्जवर जाहीराती लावणे सुरूच असल्याचे चित्र आहे. तालुक्यातील पुणे सोलापूर महामार्ग, पाटस – दौंड अष्टविनायक रस्ता, तसेच राज्य आणि जिल्हा मार्गालगत रस्त्यालगत, मोठ्या इमारतींवर ठिकठिकाणी जाहीरातीसाठी बेकायदा लोखंडी होर्डिंग्ज उभारण्यात आली आहेत.
दरम्यान जागे झालेल्या प्रशासनाने तालुक्यातील बोरीपार्धी, बिरोबावाडी, सोनवडी, वाखारी, वासुंदे, देउळगावगाडा, भांडगाव, यवत, पाटस, बोरीभडक व कुरकुंभ या ग्रामपंचायत हद्दीत असलेल्या सुमारे ५९ बेकायदा होर्डिंग मालकांना नोटीस बजावली होती. एकट्या पाटस ग्रामपंचायत हद्दीमध्येच २२ बेकायदा होर्डिंग आहेत. या लोखंडी होर्डिंग उभारणाऱ्या संबंधित मालकांनी कोणत्याही प्रशासनाची कायदेशीर परवानगी घेतली गेली नसल्याचे उघड आहे.
अत्यंत धोकादायक आणि अपघाताला निमंत्रण देणाऱ्या या होर्डिंग्जधारकांना प्रशासन पाठीशी का घालत आहे? असा सवाल आता उपस्थित होत आहे. मागील कित्येक वर्षांपासून या लोखंडी होर्डिंग्ज मालकांनी जाहिरातीवर लाखोंची कमाई केली आहे, मग प्रश्न हा पडतो की, यामध्ये प्रशानाची आर्थिक टक्केवारी आहे का? पुढच्या महिन्यात जगदगुरु संत तुकाराममहाराज यांचा पालखी सोहळा दौंड तालुक्यात आगमन होणार आहे. सध्या तालुक्यात सर्वत्र वादळी वाऱ्यासह पाऊस सुरू आहे. वादळी वाऱ्यासह पावसाने ऐन पालखी सोहळ्यात हे होर्डींग्ज पडून दुर्घटना घडल्यास त्यास जबाबदार कोण?
दरम्यान, या संदर्भात दौंड पंचायत समितीचे गट विकास अधिकारी प्रशांत काळे यांना विचारले असता, ते म्हणाले की, संबंधित होर्डींग्ज धारकांना नोटीस बजावली होती. काही होर्डींग्ज धारकांनी आवश्यक कागदपत्रे सादर केली आहेत. त्याची पडताळणी सुरू आहे. ३० जून च्या आत बेकायदा होर्डींग्ज काढण्यात येतील.
