सुरेश मिसाळ : महान्यूज लाईव्ह
इंदापूर : आपल्याकडे लेकी बोले, सुने लागे अशी एक म्हण आहे. रिपब्लिकन पक्षाने इंदापूरच्या तहसीलदारांवर झालेल्या हल्ल्यानंतर या हल्ल्याला काही घरभेदी ही कारणीभूत आहेत असा संशय व्यक्त करत एक उपरोधक मागणी केली आहे.
यामध्ये वाळू तस्करांवर कारवाई करण्याचा ठेका घेतलेल्या दोन पोलीस कर्मचाऱ्यांना आता तातडीने पोलीस संरक्षण द्या, कारण ते अत्यंत जीवावर बेतणारे काम करत आहेत, जर गुन्हेगार तालुक्याच्या प्रमुखावर हल्ला करण्यास भीत नसतील तर या दोन पोलीस कर्मचाऱ्यांची काय कथा? अशा स्वरूपाची उपरोधिक भीती व्यक्त करत त्यांना झेड प्लस सुरक्षा द्या अशी मागणी केली आहे. या अजब मागणीची सध्या गजब चर्चा इंदापुरात सुरू आहे.
२४ मे रोजी इंदापूरचे तहसीलदार श्रीकांत पाटील व चालक मल्हारी मखरे यांच्यावर भरदिवसा संविधान चौकात झालेल्या जीवघेण्या हल्ल्यामुळे सरकारी अधिकारी कर्मचारी सुरक्षीत राहिला नसल्याची भावना व्यक्त होत आहे. या पार्श्वभूमीवर इंदापूर पोलीस स्टेशनच्या दोन पोलीस कर्मचाऱ्यांची नावे निवेदनात नमूद करून त्यांना तात्काळ पोलीस संरक्षण द्या अशी मागणी आरपीआयचे पुणे जिल्हा कार्याध्यक्ष शिवाजी मखरे व तालुकाध्यक्ष बाळासाहेब सरवदे यांनी जिल्हाधिकारी, जिल्हा पोलिस अधीक्षकांना केली आहे.
संबंधित प्रशासनाला दिलेल्या निवेदनात म्हटले आहे की, २४ मे २०२४ रोजी इंदापूरचे कर्तव्यदक्ष तहसिलदार श्रीकांत पाटील यांच्यावर वाळू माफियांनी जिवघेणा हल्ला केला. त्यामधून ते थोडक्यात बचावले, यानंतर पोलीसांनी तात्काळ काही आरोपींना ताब्यात घेतले आहे. परंतु इंदापूर पोलीस स्टेशनचे दोन कर्मचारी हे रात्रंदिवस या वाळु तस्करांचा पाठलाग करत असतात, त्यांना हॉटेलमध्ये किंवा नदीकाठी निर्जन ठिकाणी भेटतात, त्यामुळे या दोन पोलीसांच्या जिवितास धोका निर्माण झाला आहे.
त्यांच्या जिविताच्या रक्षणासाठी त्यांना ताबडतोब झेड प्लस दर्जाचे पोलीस संरक्षण द्यावे, तसेच ते वापरत असलेल्या मोबाईल फोनचे व त्यांच्या नातेवाईकांचे मोबाईल फोनचे सीडीआर व कॉल डिटेल्स तपासण्यात यावे अशी मागणी करण्यात आली आहे.
अन्यथा इंदापूर पोलीस स्टेशन समोर सनदशीर मार्गाने आंदोलन करावे लागेल, असा इशाराही देण्यात आला आहे. त्या दोन्ही पोलिसांचे वाळू माफियांशी लागेबांधे असल्याचा आरोप केला जात असून त्या पार्श्वभूमीवर ही मागणी करण्यात आली आहे.
