राजेंद्र झेंडे,महान्यूज लाईव्ह
दौंड : दौंड पोलीस ठाण्याचा फक्त चार्ज घेतला आणि लागलीच हद्दीतील अवैध धंदे बंद करून, बेशिस्त वाहतुकीला शिस्त लावणारे, रोडरोमीओ तसेच गंभीर गुन्ह्यातील आरोपींना अवघ्या काही तासातच जेरबंद करणारे पोलीस खात्यातील एक जिगरबाज पोलीस निरीक्षक चंद्रशेखर यादव यांची लगेचच तडकाफडकी बदलीही करण्यात आली.
पुणे ग्रामीण पोलीस अधीक्षक पंकज देशमुख यांनी बदलीचे आदेश जारी नुकताच केला असल्याची प्राथमिक माहिती मिळत आहे. दरम्यान, बदलीचे नेमके कारण मात्र समजू शकले नसले, मात्र या बदलीमुळे ग्रामीण भागात विशेषतः दौंड तालुक्यात तीव्र नाराजी व्यक्त केली जात आहे.
लोकसभा निवडणुकीच्या पार्श्वभूमीवर एक महिन्यापूर्वी जिल्ह्यातील पोलीस अधीक्षक, अतिरिक्त पोलीस अधीक्षक तसेच पोलीस निरीक्षक यांच्या बदल्या झाल्या होत्या. यामध्ये दौंड व यवत पोलीस ठाण्याचाही समावेश होता. पोलीस निरीक्षक चंद्रशेखर यादव यांनी १ फेब्रुवारी रोजी दौंड पोलीस ठाण्याचा पदभार स्वीकारला होता. पदभार स्वीकारतात यादव यांनी आपल्या पोलीस स्टाईलने कामकाजाला सुरुवात केली होती.
दौंड शहरातील मुख्य चौकात व रस्त्यावर वाकडीतिकडे लावली जाणारी वाहनांवर त्यांनी कारवाई करत शिस्त लावली. तसेच महिला व शालेय मुलींची छेडछाड करणारे टवाळखोर रोडरोमीओ यांचाही त्यांनी बंदोबस्त केला. तर दौंड पोलीस ठाण्याच्या हद्दीतील मटका, जुगार, गावठी दारू अशा अवैध धंदावर छापा टाकून ते बंद करून त्यांच्यावर गुन्हे दाखल करुन ठोस अशी कारवाई केली होती.
छत्रपती शिवाजी महाराजांची जयंती असेल किंवा इतर धार्मिक व सामाजिक उत्सव व कार्यक्रम असेल, तर त्या पार्श्वभूमीवर सामाजिक सलोखा व कायदा सुव्यवस्था, शांतता राखण्याच्या उद्देशाने विविध सामाजिक संघटना, राजकीय संघटना यांच्या प्रमुख पदाधिकाऱ्यांची बैठक घेऊन सामाजिक व धार्मिक सलोखा जोपासण्याचे महत्त्वाची कामगिरी ही त्यांनी केली. कोणत्याही राजकीय दबावाला न जुमानता नि:पक्ष काम करत निष्पाप व्यक्तींवर अन्याय होणार नाही याची दक्षता ही पोलीस निरीक्षक यादव यांनी घेतली होती.
अवघ्या एका महिन्यात त्यांनी दोन दरोड्यातील चार आरोपी, जबरी चोरी व घरफोडी तील पाच आरोपी , विनयभंगाच्या गुन्ह्यातील फरार आरोपी, ६ गंभीर गुन्ह्यांचा छडा लावत आरोपींना जेरबंद केले. तसेच संत तुकाराम महाराज पालखी महामार्गावर वासुंदे येथे एका महाराष्ट्र बँक वसुली एजंटच्या खुनातील आरोपीला अवघ्या काही तासातच अटक केली होती.
पोलीस निरीक्षक चंद्रशेखर यादव यांच्या या कामकाजामुळे अल्पवधीतच त्यांनी दौंडकरांची मने जिंकली होती. त्यांच्या कामकाजावर सर्वसामान्य जनता, ज्येष्ठ नागरिक, विद्यार्थी व महिला वर्गांकडून समाधान व्यक्त केले जात होते. मात्र यादव यांची अचानक बदली झाल्याने सामान्य नागरिकांनी नाराजी व्यक्त केली.
यादव यांची बदली रद्द करून त्यांना पुन्हा दौंड पोलीस ठाण्यातच रुजू करावे अशी मागणी ही दौंड पोलीस ठाण्याच्या हद्दीतील ग्रामस्थ महिला व विद्यार्थी करीत आहेत. दरम्यान, पोलीस निरीक्षक चंद्रशेखर यादव यांच्या बदलीनंतर त्यांची जागी कोणाची नियुक्ती केली आहे हे मात्र समजू शकलेले नाही.
