इंदापूर : महान्यूज लाईव्ह
इंदापूर मध्ये आमदार गोपीचंद पडळकर यांच्यावर चप्पल फेकण्याचा प्रयत्न झाला, या घटनेच्या निषेधार्थ ओबीसी संघटनांनी इंदापूर बंदची हाक दिली आहे. या पार्श्वभूमीवर अखिल भारतीय मराठा महासंघाच्या जिल्हा शाखेने केलेले आवाहन अत्यंत महत्त्वपूर्ण आहे. यामध्ये मराठा महासंघाचे जिल्हाध्यक्ष एडवोकेट पांडुरंग जगताप यांनी या बंदला कोठेही विरोध करू नका. ही गोष्ट भावनिक आहे. त्यामध्ये सहभागी व्हा. कोणाच्याही भावना दुखावू नका असे आवाहन केले आहे.
जगताप यांनी म्हटले आहे की, मराठा आरक्षणाची लढाई अंतिम टप्प्यामध्ये आलेली आहे. मराठा आरक्षणाची मागणी ही राज्य शासनाकडे आहे. मराठा आरक्षण कोणत्याही जाती धर्माच्या विरोधी नाही. ती कायदेशीर मागणी आहे..
दोन दिवसापूर्वी इंदापूर तहसील कचेरी समोर झालेल्या घटनेच्या निषेधार्थ ओबीसी समाज बांधवांच्या वतीने इंदापूर तालुका बंदची हाक दिलेली आहे. सदरची गोष्ट भावनिक असल्यामुळे समाज बांधवांनी सदर बंद मध्ये सहभागी होऊन अथवा बंदमध्ये कोठेही विरोध न करता सदर बंदच्या काळामध्ये कोणाच्याही भावना दुखावल्या जाणार नाहीत अथवा कायदा सुव्यवस्थेचा प्रश्न निर्माण होणार नाही याची सर्वांनी दक्षता घ्यावी.
विशेषतः तरुणांनी दक्षता घेऊन बंद काळामध्ये कोणताही अनुचित प्रकार घडणार नाही व त्यामुळेही मराठा आरक्षण प्रक्रिया लांबणीवर जाणार नाही याची गांभीर्यपूर्वक दक्षता घ्यावी ही विनंती ॲड.पांडुरंग जगताप यांनी केली आहे. कोणत्याही नेत्यावरील अशी चप्पल फेक मान्य नाही. या चप्पलफेक घटनेच्या निषेधार्थ हा बंद पुकारण्यात आला आहे. त्यामुळे यामध्ये कोठेही अनुचित प्रकार घडू नये, याची दक्षता मराठा समाज बांधवांनी घ्यावी असे आवाहन जगताप यांनी केले आहे.
