सुरेश मिसाळ : महान्यूज लाईव्ह
इंदापूर : नातलगाच्या अंत्यविधीला गेल्यावर चोरट्यांनी चोरीचा डाव साधत तब्बल 2 लाख रुपयांच्या रोख रक्कमेसह 5 लाख 3 हजार रुपये किमतींचे सोन्याचे दागिने असा एकूण 7 लाख 3 हजार रुपये किमतीचा ऐवजांची चोरी केली.इंदापूर तालुक्यातील सरडेवाडी येथील जमदाडे वस्ती येथे ही घरफोडी झाली.
याबाबत भालचंद्र तानाजी जमदाडे (रा.जमदाडेवस्ती सरडेवाडी,ता.इंदापूर, पुणे) यांच्या फिर्यादीवरुन इंदापूर पोलीस ठाण्यात अज्ञात चोरांविरोधात चोरीचा गुन्हा दाखल करण्यात आला आहे. जमदाडे यांनी दिलेल्या फिर्यादीनुसार, त्यांच्या सरडेवाडी जमदाडे वस्ती येथे दोन स्लॅब च्या खोल्या व दोन पत्राच्या खोल्या आहेत.
14 नोव्हेंबर 2023 रोजी रात्री 10 वाजण्याच्या सुमारास जमदाडे, त्यांची पत्नी, आई असे तिघे नातलगाच्या अंत्यविधीकरीता फोंडशिरस कदमवाडी (ता. माळशिरस जि.सोलापुर) येथे गेले होते.जाताना त्यांनी त्यांच्या दोन मुलींना चुलत भाऊ गणेश वामन जमदाडे यांचे घरी सोडले होते. त्यांचे वडील तानाजी जमदाडे हे घरी एकटेच होते.
जाताना स्लॅबच्या एका खोलीला कुलूप लावले होते व दुसऱ्या खोलीत वडील तानाजी जमदाडे हे झोपले होते.
त्यानंतर 15 नोव्हेंबर रोजी सकाळी 7 वाजण्याच्या सुमारास चुलतभाऊ गणेश जमदाडे याचा फिर्यादी भालचंद्र जमदाडे यांना फोन आला. घराचे दरवाजाला लावलेले कुलूप तुटलेले असुन घरातील साहित्य अस्थाव्यस्त पडले असून घरी चोरी झाली आहे याची कल्पना त्याने दिली.
जमदाडे यांनी घरी येऊन पाहणी केली असता घरामधील शोकेसचे कपाट उघडे दिसले, कपाटामध्ये सोन्याचे दागिने ठेवलेली बॅग व डबा दिसून आला नाही. तसेच आईच्या ऑपरेशनसाठी जमा केलेले पैसे कपाटामध्ये दिसून आले नाहीत. त्यामुळे त्यांनी इंदापूर पोलीसात गुन्हा दाखल केला असून पोलीस निरीक्षक दिलीप पवार यांच्या मार्गदर्शनाखाली अधिक तपास सुरु आहे.
