वर्षा गायकवाड : महान्यूज लाईव्ह
भोर : तालुक्यातील वरंधा घाट या ठिकाणी रविवारी पहाटे अडीच वाजता शिरगावनजिक मिनी बस दरीमध्ये कोसळून अपघात झाला. या अपघातामध्ये वाहन चालक आपला जीव वाचवण्यासाठी व प्रवाशांच्या मदतीसाठी दरीतून वरती आला आणि त्यानंतर त्याने मदतीची हाक दिली, नंतर काही वेळातच उपचारासाठी त्याच्यासह इतरांना रुग्णालयात दाखल करण्यात आलं, परंतु या अपघातात ज्याने मदतीचा हात मागितला होता त्याचाच मृत्यू झाल्याची घटना घडली आहे.
भोर पोलीस स्टेशन हद्दीतील वरंधा घाटात शिरगावजवळ रविवारी (दि.८) पहाटे अडीचच्या सुमारास मिनीबस दरीत कोसळून अपघात घडला. या अपघातात अजिंक्य संजय कोलते रा. धनकवडी पुणे ) यांचा उपचारादरम्यान मृत्यू झाला असून, राजेंद्र लाला मिसाळ (रा. पद्मावती पुणे), रमेश तुकाराम महाडिक (रा. पुणे) सुभाष कदम राहणार (पुणे) ,करिष्मा उत्तम कांबळे (रा. सिंहगड पुणे) यांना पुढील उपचारासाठी पुणे या ठिकाणी पाठविण्यात आले आहे.
काय होता घटनाक्रम?
स्वारगेट ते चिपळूण १० व्यक्तींना घेऊन स्वारगेट- भोर- महाड मार्गे चिपळूणकडे जात असताना वरंध घाट येथील शिरगाव जवळ गाडीवरील नियंत्रण सुटल्याने गाडी ६० फूट दरीत कोसळली. वाहन चालकाने जखमी अवस्थेत वरती येऊन स्थानिकांनी याबाबत माहिती दिली. त्यानंतर लागलीच हॉटेल मालक दत्ता पोळ, अक्षय धुमाळ, भीमा पोळ, संतोष पवार या शिरगावच्या तरुणांनी घटनास्थळी धाव घेतली .
या सर्वांनी अधांतरी असलेल्या बसला प्रथम दोरीने बांधले व त्यानंतर अपघातग्रस्त गाडीतीतील प्रवाशांना सुखरुप बाहेर काढले. पोलीस स्टेशन ला माहिती कळवली असता, अपघाताची माहिती मिळताच घटनास्थळी भोर पोलीस स्टेशनचे पोलिस निरीक्षक शंकर पाटील आपल्या सहका-यांसह, रेस्क्यु टीमसह घटनास्थळी दाखल झाले.
या अपघातामधील सर्व व्यक्तींना सुखरूप बाहेर काढण्यात आले. सदर अपघातातील पाच जखमी प्रवाशांना उपजिल्हा रुग्णालय भोर या ठिकाणी उपचार कामी पाठवण्यात आले . या अपघातात जखमींपैकी अजिंक्य संजय कोलते रा. धनकवडी पुणे यांचा उपचारादरम्यान मृत्यू झाला असून, राजेंद्र लाला मिसाळ रा. पद्मावती पुणे, रमेश तुकाराम महाडिक रा.पुणे सुभाष कदम राहणार पुणे ,करिष्मा उत्तम कांबळे रा. सिंहगड पुणे यांना पुढील उपचारासाठी पुणे या ठिकाणी पाठविण्यात आले आहे.
