सुरेश मिसाळ : महान्यूज लाईव्ह
इंदापूर : जोगवा मागताना रस्ता ओलांडताना इंदापूर शहरातील 87 वर्षीय वृद्धास भरधाव वेगाने येणा-या दुध टॅंकरची पाठीमागील चाकाची धडक बसून चाकाखाली चिरडल्याने वृध्द ठार झाला.या अपघात प्रकरणी दुध टॅंकर चालकावर इंदापूर पोलीस ठाण्यात गुन्हा दाखल करण्यात आला आहे.
आंबादास शंकर जाधव (वय 87 वर्षे रा.रामोशी गल्ली इंदापुर ता. इंदापुर जि.पुणे) असे अपघातात मृत्यू झालेल्या वृद्धाचे नाव आहे. हा अपघात मंगळवारी (दिनांक १२) रोजी सायंकाळी पावणे सहा वाजण्याच्या सुमारास सोलापूर शहराच्या बायपास महामार्गावर इंदापुर ते अकलुज रोडच्या उजवे बाजुला हाँटेल कार्नर समोर रोडवर झाला.
याबाबत अजय बाळु जाधव (वय 30 वर्षे व्यवसाय हाँटेल रा. रामोशी गल्ली इंदापुर ता. इंदापुर) यांनी इंदापूर पोलीस ठाण्यात फिर्याद दिली आहे. फिर्यादीवरून टँकर चालक किशोर किसन भोसले (वय 59 वर्षे रा. जिंती ता.करमाळा जि.सोलापुर) याच्यावर इंदापूर पोलीस ठाण्यात गुन्हा दाखल करण्यात आला आहे.
इंदापूर पोलिसांनी दिलेल्या माहितीनुसार, फिर्यादी अजय जाधव यांचे चुलत आजोबा आंबादास शंकर जाधव (वय 87 वर्षे रा. रामोशी गल्ली इंदापूर) हे गावच्या हद्दीत इंदापुर ते अकलुज रोडच्या उजवे बाजुला हॉटेल कार्नर येथे जोगवा मागुन फिर्यादी अजय जाधव यांच्या हॉटेलकडे रस्ता क्रॉस करुन येत होते , तेव्हा अकलुज बाजुकडुन येणारा दुध टँकर (नंबर MH14/EM/7699) यावरील चालकाने ताब्यातील दुध टँकर रहदारीचे नियमांकडे दुर्लक्ष करुन भरधाव वेगात आणला.
टॅंकर चालकाने बारामती बाजुकडे वळवून आंबादास जाधव यांना टँकरच्या उजवे बाजूच्या पाठीमागील टायरची धडक देऊन अपघात केला. अपघातात आंबादास जाधव यांचे पोटाला मार लागल्याने ते गंभीर जखमी झाले. त्यातच त्यांचा मृत्यू झाला. या अपघात प्रकरणी टँकर चालक किशोर किसन भोसले (वय 59 वर्षे रा. जिंती ता.करमाळा जि.सोलापुर) याच्यावर इंदापूर पोलीस ठाण्यात गुन्हा दाखल करण्यात आला आहे. पुढील तपास इंदापूर पोलीस ठाण्याचे पोलीस निरीक्षक दिलीप पवार यांच्या मार्गदर्शनाखाली पोलीस हवालदार अमोल खैरे करत आहेत.
