मुंबई : महान्यूज लाईव्ह
अभिनेता सुशांतसिंग राजपूत आत्महत्या प्रकरणात दररोज नवनवीन गोष्टी बाहेर येत आहेत. तपासात बाधा येईल अशा स्वरूपाचे वृत्तांकन होत असल्याच्या पार्श्वभूमीवर मुंबई उच्च न्यायालयाने गंभीर दखल घेतली आहे. त्यामुळे आता उच्च न्यायालयाने सुशांत प्रकरणी माध्यमांनी दूर राहण्याची विनंती केली आहे.
सुशांतसिंग प्रकरणात माध्यमांनी मोठ्या प्रमाणात वेगवेगळ्या प्रकारे वृत्तांकन केल्यामुळे संपूर्ण देशाचे लक्ष या प्रकरणाकडे लागले आहे. काही माध्यमांनी तर अक्षरश: आक्रस्ताळेपणे हा संपूर्ण विषय लावून धरला. या पार्श्वभूमीवर माजी पोलिस अधिकाऱ्यांनी मुंबई उच्च न्यायालयात याचिका दाखल केली होती. त्यावर सुनावणी करताना उच्च न्यायालयाने माध्यमांनी या प्रकरणापासून दूर राहण्याचा विनंतीवजा आदेश दिला आहे.
माध्यमांकडून सुशांतसिंग प्रकरणाच्या तपासात बाधा येऊ नये यांची खबरदारी घेतली जावी असा सल्लाही उच्च न्यायालयाकडून देण्यात आला आहे. एकूणच काय तर माध्यमांच्या आक्रस्ताळेपणाला उच्च न्यायालयानेच लगाम लावला असून आता माध्यमांची काय भूमिका राहते याकडेच सर्वांचे लक्ष लागले आहे.
