दौंड तालुक्यातील भांडगाव येथील घटना!
राजेंद्र झेंडे, महान्यूज लाईव्ह
दौंड : आपला पती काही दिवसांपासून बेपत्ता झाल्याची तक्रार भांडगाव येथील विवाहीत महिलेने यवत पोलीस ठाण्यात दिली होती. मात्र यवत पोलिसांनी आपल्या सूक्ष्म नजरेतून या प्रकरणाचा छडा लावत बेपत्ता झाल्याची तक्रार घेऊन आलेल्या पत्नीनेच प्रियकराच्या मदतीने पतीचा दगडाने ठेचून खून करून मृतदेह विहिरीत टाकल्याचे पोलीस तपासात निष्पन्न झाले.
ही घटना दौंड तालुक्यातील भांडगाव येथे घडली. याप्रकरणी अतुल प्रभाकर चौगुले (सध्या रा भांडगाव ता. दौंड जि. पुणे मुळ रा पाटेठाण ता.दौंड जि.पुणे ) व शितल सुनिल जगताप (रा.भांडगाव ता.दौंड जि.पुणे ) या दोघांवर गुन्हा दाखल करण्यात आला आहे.
याबाबत यवत पोलिसांनी दिलेली अधिक माहिती अशी की, भांडगाव येथील शितल जगताप हिने बुधवारी ( १७ मे ) रोजी यवत पोलीस ठाण्यात आपला पती सुनील जगताप हे बेपत्ता झाल्याची तक्रार दिली. त्यानंतर दुसऱ्या दिवशी गुरुवारी (दि.१८) या बेपत्ता असलेल्या सुनील जगताप याचा घरापासून काही अंतरावर असलेल्या बाळासाहेब भिंताडे यांच्या विहिरीमध्ये मृतदेह पाण्यात तरंगत असल्याचे आढळून आले.
यवत पोलीस ठाण्याचे पोलीस उपनिरीक्षक प्रशांत मदने यांनी तत्काळ घटनास्थळी धाव घेत मृतदेह पाण्यातून बाहेर काढला. मृत सुनील जगताप याच्या डोक्याला जखम असल्याचे यावेळी निदर्शनास आल्याने पोलिसांचा संशय अधिकच बळावला आणि पोलिसांनी अवघ्या काही तासातच या गुन्ह्याचा छडा लावला.
फिर्यादी शितल जगताप व अतुल चौगुले या दोघांमध्ये प्रेमसंबंध होते. पती हे सतत दारू पिऊन त्रास देत असल्याने शितल जगताप व तिचा प्रियकर अतुल चैघुले यादोघांनी १५ मे २०२३ रोजी पहाटे ५ वाजण्याच्या सुमारास सुनिल जगताप हे घरासमोर झोपलेला असताना त्याच्या डोक्यात दगड घालुन खून केला.
त्याचा मृतदेह विहीरीत टाकला तसेच रक्ताने माखलेले कपडे घरासमोर जाळुन पुरावा नष्ट केल्याचे पोलीस तपासात निष्पन्न झाले. याप्रकरणी यवत पोलिसांनी खून करणे व पुरावा नष्ट करणे या प्रकरणी दोघांवर गुन्हा दाखल केला.
