बारामती : महान्यूज लाईव्ह
बारामती शहर आणि तालुक्यात वाढत असलेल्या कोरोना प्रादुर्भावाच्या पार्श्वभूमीवर बारामती पोलिसांनी कडक धोरण अवलंबले आहे. त्यानुसार उद्यापासून शहरात दुचाकीवरून डबलसीट, विनामास्क फिरणाऱ्या तसेच चारचाकीत तीनपेक्षा अधिक व्यक्ती फिरणाऱ्यांवर कडक कारवाई करण्याचा इशारा बारामतीचे उपविभागीय पोलिस अधिकारी नारायण शिरगावकर यांनी दिला आहे.
बारामतीत मागील काही दिवसांत कोरोनाचे रुग्ण मोठ्या प्रमाणात वाढले आहेत. त्यामुळे शहरात लॉकडाऊनही लागू करण्यात आला. आता हा लॉकडाऊन संपत असतानाच पोलिसांनी उद्यापासून दुचाकीवरून डबल सीट, विनामास्क आणि चारचाकीत तीनपेक्षा अधिक व्यक्ती फिरल्यास कारवाई करण्याचा निर्णय घेतला असल्याचे पोलिस निरीक्षक औदुंबर पाटील यांनी सांगितले.
बारामती शहर आणि तालुक्यात कोरोनाचे रुग्ण मोठ्या प्रमाणात आढळले. त्यामध्ये शहरातील रुग्णांची संख्या मोठी आहे. ही बाब लक्षात घेऊन बारामती पोलिसांनी आता कडक धोरण अवलंबले आहे. त्यानुसार उद्यापासून शहरात कडक अंमलबजावणी केली जाणार आहे. त्यामुळे आता बारामतीकरांनी घरात थांबून प्रशासनाला सहकार्य करण्याची आवश्यकता व्यक्त होत आहे.
