बारामती : महान्यूज लाईव्ह
आज गोविंदबागेत ज्येष्ठ नेते शरद पवार यांनी बारामती वैद्यकीय महाविद्यालयाचे अधिष्ठाता डॉ. संजयकुमार तांबे यांच्याकडून बारामतीतील वाढत्या कोरोना रुग्णांविषयी माहिती घेतली. उपाययोजनांचीही माहिती घेऊन त्यांनी डॉ. तांबे यांच्याकडे एक भेट सूपर्त केली आणि ही महत्वाची इंजेक्शन्स आपल्या गरजू रुग्णांसाठी वापरण्याचा सल्ला दिला. बारामतीकरांसाठी दिलेली ही भेट होती, पवारसाहेबांना परदेशातून आलेली रेमिडिसीवर औषधांची..!
पवारसाहेब आणि बारामतीचे अतूट नाते पाच दशकांहून अधिक काळचे तर आहेच, परंतू अगदी छोट्या छोट्या बाबींतही पवार कुटुंबियांचे बारामतीवरील प्रेम अगदी सहजगत्या दिसून येते. आज डॉ. संजयकुमार तांबे यांना याचा परिचय आला. डॉ. तांबे यांनी श्री. पवार यांची गोविंदबागेत भेट घेऊन बारामती वैद्यकीय महाविद्यालयाच्या सद्यस्थितीची माहिती दिली. कोरोनाग्रस्तांसाठी सुरू केलेल्या स्वाब तपासणी प्रयोगशाळेसह उपाययोजनांची माहिती दिली. येथे सुरू असलेल्या कामकाजाबाबत पवार यांनी समाधान व्यक्त केले, मात्र कोरोनामुक्त झालेल्या बारामतीत पुन्हा नव्याने कोरोनाग्रस्त आढळू लागल्याबद्दल चिंताही व्यक्त केली. ही चर्चा सुरू असतानाच पवार यांनी डॉ. तांबे यांच्याकडे ही औषधे सूपूर्त केली. सध्या रेमिडीसीव्हर व टॉसीलीझूमॅब या दोन महत्वाच्या औषधांचा कृत्रिम तुटवडा असल्याचे, तसेच त्यांचा काळाबाजार होत असल्याची चर्चा आहे, त्याचा वापर कोरोनाग्रस्तांसाठी महत्वपूर्ण असल्याने ऐन अडचणीच्या काळात श्री. पवार यांनी दिलेली ही बारामतीकरांसाठीची भेट तशी खूपच महत्वाची ठरली. या भेटीचा अनुभव सांगताना डॉ. तांबे यांनी अनपेक्षित मिळालेली महत्वाची भेट असे त्याचे वर्णन करीत ही औषधे गरजू रुग्णांसाठी वापरावीत असा वडीलकीचा सल्ला पवारसाहेबांनी दिला असे स्पष्ट केले.
