बारामतीत खाजगी सावकारी करणाऱ्या महिलेला तिच्या साथीदाराला अटक!
बारामती : महान्यूज लाईव्ह
बारामतीत खाजगी सावकारकीचे स्तोम एवढे वाढले आहे की, आता महिलादेखील सावकारी करू लागले आहेत पैशाच्या वसुलीसाठी बलात्काराच्या गुन्ह्यात अडकवण्याच्या देखील धमक्या देऊ लागल्या आहेत. बारामती शहर पोलिसांनी अशाच एका प्रकारात महिलेला व तिच्या साथीदाराला गुन्हा दाखल करून अटक केली आहे.
यासंदर्भात पोलिस सूत्रांनी दिलेली माहिती अशी की, बारामती शहरातील तुळजाराम चतुरचंद कॉलेज नजीक राहणाऱ्या राजश्री रमेश मोरे व डोर्लेवाडी तालुका बारामती येथील विशाल बाबुराव सूर्यवंशी या दोघांवर गुन्हा दाखल करून पोलिसांनी त्यांना अटक केली आहे. याप्रकरणी शहरातील कसबा येथे हॉटेल व्यवसाय का असलेल्या किरण सातव यांनी बारामती शहर पोलिसांकडे फिर्याद दिली होती.
सातव यांना व्यवसायांमध्ये अचानकपणे पैशाची गरज लागल्याने त्यांनी पैशासाठी विचारणा करण्यास सुरुवात केली. तेव्हा त्याचा मित्र विशाल सूर्यवंशी याने राजश्री मोरे ही महिला व्याजाने पैसे देते, तिच्याकडून व्याजाने पैसे घेऊन देतो. लवकर भरले तर काही अडचण येणार नाही असा सल्ला दिला आणि त्याने राजश्री मोरे हिला किरण सातव याची ओळख करून दिली.
मोरे हिने सातव याला 55 हजार रुपये व्याजाने दिले. त्यानंतर त्याचे हप्ते किरण सातव यास फेडता न आल्याने प्रत्येक आठवड्याला सात हजार रुपयांचे व्याज देण्याची अट राजश्री मोरे हिने घातली. त्यानुसार मोरे हिला पाठवलेला व्याजाचे पैसे सातव देत होता. दरम्यान पैसे थकलेने मोरे हिने सातव यांच्याकडे तीन लाख रुपयांची मागणी केली.
पैसे न दिल्यास बलात्काराच्या खोट्या गुन्ह्यात अडकवण्याची व हॉटेलवर येऊन गोंधळ घालून हॉटेल बंद करण्याची धमकी देत घरी येऊन त्रास देण्याचीही धमकी दिली. त्यावरून किरण सातव याने पोलिसांकडे फिर्याद दिली. पोलिसांनी याची दखल घेत वरील दोघांविरोधात गुन्हा दाखल केला असून पुढील तपास बारामती शहर पोलिस करत आहेत.
