माकडचाळ्यांनी हादरला उत्तर प्रदेश
महान्यूज लाईव्ह रिपोर्ट
माकड आणि विनोद यांचे एकमेकांशी जुने नाते..पण जेव्हा माकडे रुढी, रित सोडून वेगळेच काहीतरी करतात, तेव्हा माकडाच्या हातात कोलित अशी म्हण प्रचलित होते…उत्तर प्रदेशातही असंच काहीसं घडलंय…कोरोनाच्या चाचणी प्रयोगशाळेतच माकडांनी डल्ला मारला आणि डल्ला मारला तो नेमका कोरोनाच्या रुग्णांच्या घशातून घेतलेल्या स्त्रावांच्या नमुन्यावर..हे नमुनेच माकडांनी पळवून नेले आणि एका झाडावर बसून ते चघळले…आता नेमके काय होणार या चिंतेने व भीतीने मेरठसह उत्तर प्रदेशातील लोकांना ग्रासले आहे.
उत्तर प्रदेशात जशी स्थलांतरीत मजूरांची समस्या आ वासून उभी आहे, तशीच समस्या या माकडांनी दोन दिवसांत करून ठेवली आहे. या माकडांना पकडण्यापासून ते प्राण्यांमधील संसर्ग टाळण्यापर्यंत सर्वांचीच भंबेरी उडाली असून स्थानिक प्रशासनही चिंतेने मेटाकुटीला आले आहे.
या माकडांनी मेरठ येथील वैद्यकीय महाविद्यालयात असलेल्या कोरोना चाचणी प्रयोगशाळेत प्रवेश केला. फक्त प्रवेश केला नाही, तर थेट कोरोना रुग्णांचे चाचण्यासाठी आणलेले घशातील स्त्रावाचे नमुनेच पळवले. तीन किट घेऊन ही माकडे थेट आवारातील झाडांवर चढले व हे नमुने माकडांनी तोंडात चघळले. माकडांनी किट पळवले, त्यापेक्षा ते चघळले, यामुळे वैद्यकीय महाविद्यालयातील तंत्रज्ञही बावचळले आणि प्रशासनाची डोकेदुखी वाढली. सध्या उत्तर प्रदेशात स्थलांतरीत मजुरांपेक्षा माकडांचीच चर्चा अधिक आहे.
याचा व्हिडीओ पहा..
