गारवा हॉटेलचे मालक रामदास आखाडे यांचा धंदा बघवत नव्हता! व्यावसायिक द्वेषातूनच खून! अल्पवयीन मुलाचा केला वापर! लोणी काळभोर पोलिसांनी १० जणांना ठोकल्या बेड्या!

विशाल कदम :- महान्यूज लाईव्ह

उरुळी कांचन : पुणे सोलापूर महामार्गावरील उरुळी कांचन (ता.हवेली) ग्रामपंचायत हद्दीतील प्रसिध्द असलेल्या गारवा हॉटेलचे मालक रामदास आखाडे यांचा व्यावसायिक स्पर्धेतून खून झाल्याचा धक्कादायक प्रकार उघडकीस आला आहे. यामुळे जिल्ह्यात एकच खळबळ उडाली आहे. मात्र, लोणी काळभोर पोलिसांनी २ आरोपींना तब्बल सात दिवसांनी पाठलाग करून लातूर येथील गांधी चौकातून अटक करण्यात आली आहे. याआगोदर पोलिसांनी ८ आरोपींना अटक करण्यात आली आहे.

निलेश मधुकर आरते (वय-२३, रा. तुकाईदर्शन, ता. हवेली) व सतरा वर्षीय अल्पवयीन मुलगा असे अटक करण्यात आलेल्या आरोपींची माहिती आहे. तर पोलिसांनी यागोदरच निखिल बाळासाहेब खेडेकर (वय २४), सौरभ ऊर्फ चिम्या कैलास चौधरी (वय २१), अक्षय अविनाश दाभाडे (वय २७) करण विजय खडसे (वय २१), प्रथमेश राजेंद्र कोलते (वय २३), गणेश मधुकर साने (वय २०) आणि निखिल मंगेश चौधरी (वय २०, रा. हवेली) अशी अटक करण्यात आलेल्या आरोपींची नावे आहेत.

पोलिसांनी दिलेल्या माहितीनुसार, लोणी काळभोर पोलीस ठाण्याच्या हद्दीतील उरुळी कांचन यथील गारवा हॉटेलचे मालक रामदास आखाडे यांच्यावर रविवारी (ता. १८) संध्याकाळी तलवारीने खुनी हल्ला केला होता. या हल्ल्यात आखाडे यांचा बुधवारी पहाटे एका खाजगी रुग्णालयात उपचारादरम्यान मृत्यू झाला होता. त्यानुसार लोणी काळभोर पोलीस ठाण्यात खुनाचा गुन्हा दाखल करण्यात आला होता.

आरोपींना पकडण्यासाठी अपर पोलीस आयुक्त नामदेव चव्हाण, पोलीस उपआयुक्त नम्रता पाटील आणि सहाय्यक पोलीस आयुक्त कल्याणराव विधाते, लोणी काळभोर पोलीस ठाण्याचे वरिष्ठ पोलीस निरीक्षक राजेन्द्र मोकाशी, पोलीस निरीक्षक (गुन्हे)सुभाष काळे यांच्या मार्गदर्शनाखाली सहाय्यक पोलीस निरीक्षक राजु महानोर, दादाराजे पवार, पोलीस उपनिरीक्षक अमित गोरे, पोलीस हवालदार नितीन गायकवाड, गणेश सातपुते, राजु पुणेकर, अमित साळुंके, श्रीनाथ जाधव, सुनिल नागलोत, संतोष अंदुरे, संदीप धनवटे, सतीश सायकर, बाजीराव वीर, निखील पवार, गणेश भापकर, शैलेश कुदळे, राजेश दराडे, दिगंबर साळुंके यांचे पथक तयार करण्यात आले होते.

लोणी काळभोर पोलीस तपास करीत असताना आरोपीबाबत कोणताही सबळ पुरावा उपलब्ध नसल्याने तपासात अडचणी निर्माण झाल्या होत्या. परंतु, तपास करीत असताना पथकातील पोलीस हवालदार नितीन गायकवाड, अमित साळुंके, निखील पवार यांना सदर गुन्ह्यात अशोका हॉटेलचे मालक जयवंत बाळासाहेब खेडेकर यांचा भाचा सौरभ उर्फ चिम्या याचा सहभाग असल्याची गुप्त माहीती मिळाली होती. त्यानुसार तपास पथकाने सौर उर्फ चिम्या यांस ताबेत घेवुन कौशल्याने तपास केला असता सौरभ उर्फ चिम्या याने जयवंत बाळसाहेब खेडकर व त्यांचा मुलगा निखील याचे सांगणेवरून अक्षय अविनाश दाभाडे, करण विजय खडसे, प्रथमेश राजेंद्र कोलते, गणेश मधुकर माने, निखील मंगेश चौधरी, निलेश आरते व एक सतरा वर्षीय मुलगा यांचेसह रामदास आखाडे यांचे खुनाचा कट रचुन त्याप्रमाणे निलेश आरते व एका सतरा वर्षीय अल्पवयीन मुलाने रविवारी गारवा हॉटेलचे मालक रामदास आखाडे यांचेवर तलवारीने प्राणघातक हल्ला केला असल्याचे सांगितले.

पोलिसांनी अशोका हॉटेलचे मालक जयवंत बाळसाहेब खेडेकर व त्यांचा मुलगा निखील, अक्षय अविनाश दाभाडे, करण विजय खडसे, प्रथमेश राजेंद्र कोलते, गणेश मधुकर माने, निखील मंगेश चौधरी यांना अटक केली. त्यांच्याकडे चौकशी केली असता हा खून हॉटेलचा व्यवसाय वाढावा म्हणून सौरभ उर्फ चिम्या व इतर यांना दररोज एक ते दोन हजार देण्याचे सांगुन सदरचा खुन घडवुन आणल्याचे निष्पन्न झाले आहे.

दरम्यान, रामदास आखाडे यांचा खून करण्यासाठी आरोपी हे उरुळी कांचन येथील एका भाड्याच्या खोलीत राहून मागील पंधरा दिवसापासून नियोजन करीत होते. तसेच आरोपीने खून करण्यासाठी वापरलेली तलवार हि खास खून करण्यासाठी हडपसर या ठिकाणाहून बनवून घेतली होती. तसेच हा खून सतरा वर्षाच्या अल्पवयीन मुलाने केल्यास शिक्षा होणार नसल्याने हा खून केला असल्याचे तपासात निष्पन्न झाले आहे.

आरोपी नामे निलेश आरते हा सराईत गुन्हेगार असुन व त्याच्याबरोबर अल्पवयीन आरोपी हे गुन्हा करून पसार झाले होते, त्यानुसार त्यांचा शोध घेण्याच्या सुचना लोणी काळभोर पोलीस ठाण्याचे वरिष्ठ पोलीस निरीक्षक राजेंद्र मोकाशी यांनी गुन्हे शाखेच्या पोलिसांना दिले होते. त्यानुसार सदर आरोपींचा पुणे, अहमदनगर, बार्शी, सोलापुर लातूर, उस्मानाबाद जिल्हयात शोध घेत असताना एका खबऱ्यामार्फत पोलिसांना माहिती मिळाली कि, सदर दोन आरोपी हे लातूर येथील गांधी चौक या ठिकाणी आहेत. सदर आरोपी हे पोलिसांचा अंदाज आल्याने सदर आरोपींचा दहा ते बारा किलोमीटर पाठलाग करून सापळा रचून अटक केली. त्यांच्याकडे अधिक चौकशी केली असता वरील गुन्हा केल्याची कबुली दिली. यातील आरोपी निलेश आरते हा हडपसर पोलीस स्टेशन येथुन पुणे शहर व पुणे जिल्हा हददीतुन दोन वर्षाकरीता तडीपार आहे. सदर गुन्हयात एकुण १० आरोपींना अटक करण्यात आली असून पुढील तपास सुभाष काळे पोनि (गुन्हे) हे करीत आहेत.