पुणे : महान्यूज लाईव्ह
पुणे जिल्हा परिषद सदस्या रेखा बांदल यांचा जामीन अर्ज न्यायालयाने फेटाळला आहे. त्यामुळे शिरूर तालुक्यासह जिल्ह्यात राजकीय क्षेत्रात खळबळ उडाली असून मंगलदास बांदल यांच्यानंतर आता रेखा बांदल यांना अटक होणार का याची चर्चा सुरू झाली आहे.
शिवाजीराव भोसले बँकेमधील कथित घोटाळ्या प्रकरणी शिक्रापूर पोलिसांनी मंगलदास बांदल यांना तातडीने अटक झाल्यानंतर रेखा बांदल या फरार झाल्या होत्या. दरम्यान जिल्हा परिषद सदस्या रेखा बांदल यांनी न्यायालयात अटकपूर्व जामिनासाठी अर्ज केला होता. तो अर्ज न्यायालयाने फेटाळला. अतिरिक्त सत्र न्यायाधीश पी. पी. जाधव यांनी हा आदेश दिला आहे.
शिक्रापूर येथील दत्तात्रय रावसाहेब मांढरे यांच्या गाळ्यांचे बनावट कुलमुखत्यार दस्त व पुरवणी दस्त तयार करुन राष्ट्रवादी काँग्रेस चे माजी प्रदेश उपाध्यक्ष तसेच पुणे जिल्हा परिषदेच्या आरोग्य व बांधकाम समितीचे माजी सभापती मंगलदास बांदल याची पत्नी जिल्हा परिषद सदस्या रेखा बांदल यांनी शिवाजीराव भोसले बँकेचे कर्ज काढून बँकेचे सव्वा दोन कोटी रुपये कर्ज थकविले होते. याबाबत दत्तात्रय रावसाहेब मांढरे यांनी शिक्रापूर पोलिस स्टेशन येथे फिर्याद दिली असता मंगलदास बांदल व रेखा बांदल यांच्यासह सात जणांवर गंभीर गुन्हे दाखल करण्यात आले होते.
