पुणे : महान्यूज लाईव्ह
11 जून 2021.. वेळ : सकाळची.. स्थळ : शिवाजीनगर पोलीस मुख्यालय! नूतनीकरण केलेल्या इमारतीचे उद्घाटन उपमुख्यमंत्री अजित पवार यांनी केले आणि काही तरी त्यांना खटकले. कामाची पाहणी करताना त्यांनी थेट, ए कॉन्ट्रॅक्टर कुठे आहे रे? असा प्रश्न केला आणि ठेकेदार येताच ठेकेदाराला सुनवायला सुरुवात केली..! काम ट्यूब लेव्हल मध्ये झाले नाही असे पहिल्यांदा सांगत, त्यातील बारीक बारकावे अजितदादांनी ठेकेदाराला सांगण्यास सुरुवात केली आणि अधिकारीदेखील अवाक झाले! आजपर्यंत त्यांनी राजकीय नेते हे मंजूर केलेल्या कामाचे आपल्याच काळात उद्घाटन झाले पाहिजे, यासाठी आग्रही असल्याचे अनेकदा पाहिले आणि फक्त काम तातडीने करण्यासाठी ते पाठपुरावा करतात एवढे माहिती होते.. परंतु अजित पवारांना केवळ काम तातडीने व्हावे, एवढेच नाही तर ते काम दर्जेदार व्हावे असे वाटत असते आणि त्यासाठी त्यांचा आग्रह असतो आणि कामाची इत्यंभूत माहिती त्यांना असते हे अधिकाऱ्यांनी आज प्रत्यक्ष अनुभवले..!
कोणतीही सरकारी इमारत बांधताना दर्जा उत्तम असला पाहिजे याचा आग्रह धरणारे आणि बांधकामाची सकाळी सहा वाजता जाऊन पाहणी करणारे अजित दादा आजपर्यंत बारामतीतील नागरिकांनी अनुभवले.. पण आज पुण्यातील अतिवरिष्ठ पोलिस अधिकाऱ्यांनी देखील अनुभवले..! दादा इंजिनियर नाहीत, पण इंजिनिअरपेक्षा कमी नाहीत हे अनुभवताना त्यांनी अजित पवार हे राजकीय नेते म्हणून आजवर अनेकदा पाहिले.. परंतु बांधकामातील त्यांच्या ज्ञान कौशल्याच्या ‘दादा’गिरीने पोलीस अधिकारी देखील प्रभावित झाले.
अजित दादा हे त्यांच्या कामात दादा आहेत हे आजवर महाराष्ट्रातील राष्ट्रवादीच्या कार्यकर्त्यांनी अनुभवले, काँग्रेसच्या कार्यकर्त्यांनी अनुभवले, शिवसेनेच्या कार्यकर्त्यांनी अनुभवले आणि अगदी भाजपच्या कार्यकर्त्यांनी देखील अनुभवले, एवढेच नाही तर प्रशासकीय अधिकाऱ्यांनी देखील अनुभवले.. आज मात्र एरवी आपली हुकूमत आणि दादागिरी गाजवणाऱ्या पोलिस अधिकाऱ्यांनी देखील अनुभवले हीच आजची महत्त्वाची बातमी!
उपमुख्यमंत्री अजित पवार यांच्या हस्ते शिवाजीनगर, पुणे येथील पोलीस मुख्यालयाच्या नूतनीकरण केलेल्या इमारतीचे उदघाटन करण्यात आले, त्यानंतर त्यांनी कामाची पाहणी केली. तसेच कोवीड काळात विशेष योगदान दिलेल्या कर्मचाऱ्यांचा सत्कार उपमुख्यमंत्री अजित पवार यांच्या हस्ते करण्यात आला. यावेळी त्यांनी पुणे पोलिसांच्या वतीने तयार केलेल्या ‘माय पुणे सेफ’ ऍपसह पोलिसांच्या बदलीसाठी तयार करण्यात आलेल्या सॉफ्टवेअरचे उदघाटन केले.
मात्र यावेळी त्यांनी केलेल्या मुख्यालयाच्या पाहणीची आणि त्यानंतर ठेकेदाराला त्यातील सांगितलेल्या बारकाव्यांची जास्त चर्चा पोलिस अधिकाऱ्यांमध्ये झाली. बारामती मधील विकास कामे होत असताना बारामतीत आल्यानंतर अजित पवार हे पहाटे सहा वाजल्यापासून कामाची पाहणी करतात. हा त्यांचा शिरस्ता आहे. गेली कित्येक वर्ष त्यांची ही पद्धत आहे. तोच पायंडा ते जिथे जिथे उद्घाटनासाठी जातात तिथे तो पडलेला असतो कारण काम पाहिल्यानंतर काम आवडले की लगेच ठेकेदाराला द्यायची आणि काम आवडले नसेल, तर तो ठेकेदार कितीही जवळचा असला तरी त्याला सुनवायचे ही त्यांची पहिल्यापासून सवय आहे आज सकाळी पुण्यामध्ये पोलीस अधिकाऱ्यांना हा अनुभव आला.
एखादा ठेकेदार जिल्हा परिषद सदस्य झाला, आमदार झाला, मंत्री झाला तरीदेखील झालेल्या कामकाजावर थेट भाष्य करत नाही. मात्र अजित पवार हे एकमेव नेते आहेत की, ज्यांना कामाचा दर्जा चांगलाच लागतो आणि त्यासाठी ते कोणाचीही भीडभाड ठेवत नाहीत. आज देखील पुण्यामध्ये त्याने ठेकेदाराला बोलावून हे काम ट्यूब लेव्हलमध्ये नाही, तुम्ही बारामतीत जाऊन पहा, मी सकाळी सहा वाजल्यापासून कामाची पाहणी करत असतो. काम आवडले नाही, तर ते तातडीने बदलायला सांगतो. या ठिकाणी पोलिस मुख्यालयाचे काम आहे हे तरी समजून घ्यायला हवे असे सांगत त्यांनी त्यामधील छोटे छोटे बारकावे आणि छोट्या छोट्या बदलांची सूचना केली.