राणेंच्या एकेरी टिकेला रोहित पवारांचा जोर का झटका धीरेसे..
पुणे : महान्यूज लाईव्ह
माजी मुख्यमंत्री नारायण राणे हे आक्रमक नेते असले तरी कधीही खालच्या पातळीवरील टिका करीत नाहीत, वयाने मोठ्या असलेल्या लोकांबद्दल ते एकेरी बोलत नाहीत, त्यामुळे निलेश राणे यांनी किमान आपल्या वडीलांचा तरी आदर्श ठेवावा अशा खोचक शब्दांत आमदार रोहित पवार यांनी राणे यांच्या खालच्या शब्दातील टिकेला संमजस व संस्कृतीला साजेशे उत्तर दिले आहे.
गेल्या चार दिवसांत राणे-पवार यांच्यातील ट्विटर युध्द चांगलेच गाजले आहे. राज्यात या ट्विटवॉरची राजकीय क्षेत्रात मोठी चर्चा सुरू आहे. यामध्ये सुरवातीस ज्येष्ठ नेते शरद पवार यांनी पंतप्रधान नरेंद्र मोदी यांना साखर उद्योगाच्या मदतीबद्दल व एकूणच राज्यातील व्यवसायांबद्दल मदतीची अपेक्षा करणारे आवाहन केले. त्यांनी केलेल्या आवाहनात साखर उद्योग सध्याच्या संकटातून वाचण्यासाठी सहा कलमी उपाययोजना त्यांनी मोदी यांना सुचवल्या. त्यावरून माजी खासदार निलेश राणे यांनी अचानकच ट्विट करीत थेट शरद पवार यांच्यावरच टिका केली.
साखर उद्योगाला एवढी मदत करूनही पुन्हा साखर उद्योगच वाचवा? असे आवाहन कसे करता अशा अर्थाने निलेश राणे यांनी ट्विट केले. मात्र हे ट्विट पोस्ट होताच राष्ट्रवादीचे आमदार रोहित पवार यांनी खोचकपणे निलेश राणे यांना उद्देशून फक्त साखर उद्योगाला नव्हे तर कुक्कुटपालन व्यवसायाला देखील मदत करण्याचे आवाहन पवारसाहेबांनी केलेय असे प्रत्युत्तर दिले. रोहित पवार यांचे रिट्विट निलेश राणे यांना चांगलेच झोंबले.
कुक्कुटपालन या शब्दामुळे वर्मी घाव लागलेल्या राणेंना नेटकऱ्यांनीही चांगलेच हैराण केले. त्यामुळे चिडलेल्या निलेश राणे यांनी रोहित पवार यांचा शेंबडे पोर असा उल्लेख करीत खालच्या पातळीवर जाऊन एकेरी शब्दात टिका केली. त्यानंतर राष्ट्रवादी व महाविकास आघाडीच्या सोशल मिडियातील कार्यकर्त्यांत व राणे यांच्या समर्थकांमध्ये सोशल मिडियात शाब्दिक युध्द रंगले. त्यावर रोहित पवार यांनी निलेश राणे यांना नारायण राणेंकडे बोट दाखवून सल्ला घेण्याची सूचना देऊन पुन्हा डिवचले आहे. मात्र या ट्विटमुळे राणे यांना अत्यंत चांगले, संस्कृतीदर्शक उत्तर मिळाल्याची चर्चा नेटकऱ्यांमध्ये सुरू झाली.
