बारामती : महान्यूज लाईव्ह
महाविकास आघाडीच्या नेत्यांविरोधात बदनामीकारक मजकूर सोशल मिडीयात प्रसिध्द केल्याबद्दल केशव कुंथलगिरीकर व भानू बोराडे या दोन फेसबुक अकाऊंट विरोधात वडगाव निंबाळकर पोलिसांनी गुन्हा दाखल केला आहे. याप्रकरणी माहिती अधिकार कार्यकर्ते नितीन यादव यांनी फिर्याद दाखल केली होती.
या दोन फेसबुक अकाऊंटवरून महाविकास आघाडीच्या नेत्यांची बदनामीची मोहिम सुरू असल्याचा आरोप नितीन यादव यांनी केला असून त्यांनी वरील दोन फेसबुक अकाऊंटवर राष्ट्रवादीचे अध्यक्ष शरद पवार, मुख्यमंत्री उध्दव ठाकरे, पर्यावरणमंत्री आदित्य ठाकरे यांचे फोटो मॉर्फ करून बदनामीकारक मजकूर लिहीला होता व तो पोस्ट करून समाजात बदनामी करण्याचा प्रयत्न केला.
नितीन यादव या्ंना त्यांच्या फेसबुक अकाऊंटवर या दोघांनी तयार केलेला बदनामीकारक मजकूर दिसला. तो अक्षेपार्ह असल्याने त्यांनी वडगाव निंबाळकर पोलिस ठाण्यात जाऊन फिर्याद दिली. पुढील तपास सहायक निरीक्षक सोमनाथ लांडे यांच्या मार्गदर्शनाखाली वडगाव निंबाळकर पोलिस करीत आहेत.
