वनक्षेत्रात टँकरद्वारे पाणीपुरवठा
बारामती : महान्यूज लाईव्ह
सध्या उन्हाळ्याचे दिवस सुरु झाले आहेत. त्यामुळे वन्यप्राण्यांना पाण्यासाठी भटकंती करावी लागत आहे. या पार्श्वभूमीवर शरयु फौंडेशनच्या वतीने बारामती तालुक्यातील कन्हेरी येथील वनक्षेत्रात वन्यप्राण्यांसाठी टँकरद्वारे पाणीपुरवठा सुरु करण्यात आला आहे. फौंडेशनच्या अध्यक्षा शर्मिला पवार यांच्या हस्ते या उपक्रमाची सुरुवात करण्यात आली.
उन्हाळ्यामुळे वन्यप्राण्यांचे हाल होतात. त्याचबरोबर वनक्षेत्रात लावलेली झाडेही पाण्यावाचून जळून जातात. ही बाब लक्षात घेऊन
शरयु
फौंडेशनच्या अध्यक्षा शर्मिला पवार यांच्या संकल्पनेतून कन्हेरी वन्यप्राण्यांबरोबरच नव्याने केलेल्या वृक्ष लागवडीसाठी टँकरद्वारे पाणी सोडण्यास प्रारंभ करण्यात आला.
शरयु
फाऊंडेशनच्या माध्यमातून वृक्षारोपणाचे मोठे काम हाती घेण्यात आले आहे. केवळ वृक्षारोपणावर न थांबता त्या झाडांचे संगोपन करण्यावर विशेष भर दिला जात आहे. त्याचवेळी वन्यप्राण्यांची पाण्यासाठी हेळसांड होऊ नये यासाठी टँकरद्वारे पाणीपुरवठा सुरु केल्याचे शर्मिला पवार यांनी यावेळी सांगितले.
वनविभागाच्या विविध उपक्रमांना
शरयु
फौंडेशनच्या माध्यमातून सातत्याने सहकार्य लाभत असते. त्यातूनच उन्हाळ्याची तीव्रता वाढण्यापूर्वीच टँकरद्वारे पाणीपुरवठा सुरु करण्यात आला आहे. त्यामुळे वन्यप्राण्यांसह इथे लागवड केलेल्या वृक्षांनाही पाणी मिळणार असल्याचे वनपरिक्षेत्र अधिकारी राहुल काळे यांनी नमूद केले.
यावेळी शरयु फौंडेशनचे सदस्य, वनविभागाचे अधिकारी व कर्मचारी वर्ग, तसेच कन्हेरी गावातील ग्रामस्थ मोठ्या संख्येने उपस्थित होते.
