महान्यूज लाईव्ह रिपोर्ट
कोरोनाचे चंबूगबाळ राज्यातून आवरण्याची चिन्हे दिसत असतानाच निवडणूक आयोगाने कंबर कसली असून जून पासून ताटकळत असलेल्या गावकारभाऱ्यांना व नव्याने पदावर येऊ पाहणाऱ्यांना दिलासा मिळाला आहे. राज्य निवडणूक आयोगाने निवडणूकीची तयारी सुरू केली आहे. जुलै ते डिसेंबर मध्ये मुदत संपणाऱ्या पुणे जिल्ह्यातील ग्रामपंचायतींसाठी वॉर्ड रचना आरक्षणासंदर्भात सोडतींचे अहवाल तपासून मंजूरी देण्याचे आदेश देण्यात आले आहेत. त्यामुळे येत्या नोव्हेंबर, डिसेंबरमध्ये राज्यात मिनी विधानसभा निवडणूकीचा धुरळा उडेल अशी चिन्हे आहेत.
सोडतीच्या व आरक्षण मंजूरीच्या प्रक्रियेसाठी २७ ऑक्टोबरची मुदत देण्यात आली असून याचाच अर्थ असा की, नोव्हेंबर, डिसेंबरमध्ये निवडणूकांचा कार्यक्रम जाहीर होण्याची चिन्हे आहेत. सध्या राज्यातील बहुतांश ग्रामपंचायतींवर प्रशासकांची नियुक्ती करण्यात आली असून एका-एका प्रशासकांकडे आठ-दहा, बारा गावांचा कारभार असल्याने ग्रामपंचायतींची कामे खोळंबली आहेत. त्यामुळे ग्रामपंचायतींचा कारभार पूर्ववत होण्याची प्रतिक्षा आता गावकरी करू लागले आहेत. अशातच राज्य निवडणूक आयोगाने हा दिलासा दिला आहे.
