सुरेश मिसाळ : महान्यूज लाईव्ह
इंदापूर : तुम्हाला झटपट श्रीमंत व्हायचेय? मग लागलीच एक हायवा डंपर घ्या नाहीतर एक ट्रॅक्टर ट्रॉली! घेतली?…ओके..! आता ट्रॅक्टर असेल तर २५ हजार रुपये, ट्रक असेल तर ३० हजार रुपये महिन्याला कार्ड घ्या.. मग महसूलच्या अधिकाऱ्यांना १५ हजार रुपये द्या.. आणि करा बिनधास्त वाळू वाहतूक…व्हा गर्भश्रीमंत.. ढॅण्डढॅण..!
राज्यात वाळूचे लिलाव कुठे झालेत माहितेय का?… इंदापूर तालुक्यात! वर्षात पाच कोटींचा दंडापोटीचा वसूल जिल्हा कोषागारात पाठवला की, महसूलचा डोक्यावरचा ताण हलका होतो..मग कोणीतरी अधिकारी उठून थेट वाळूच विकतो..जर त्यांचे ट्रक पकडले तर पोलिस ठाण्यात हंगामा करतो… पोलिस अधिकारीही गप्प बसतो..का? तर तेदेखील कार्ड- कार्ड खेळतात..ट्रॅक्टरसाठी २५ हजारांचे कार्ड आणि ट्रकसाठी ३० हजारांचे..!
वाळूची तस्करी इंदापूर तालुक्यासाठी आता काही नवीन बाब राहीली नाही. मात्र कष्ट करायचे वाळूचोरांनी आणि चोरावर मोर होणाऱ्यांना पैसे मुबलक मिळतात.. आणि ती तर सरकारी यंत्रणा असते ही त्याहून किळसवाणी बाब.!
सरकारी यंत्रणेचा वाळू चोरीत सहभाग आहे की नाही हे ओळखण्यासाठी काल घडलेला किस्सा पुरेसा आहे. इंदापूर तालुक्यातील भीमा काठच्या परिसरातून अवैध वाळूची वाहतूक होत आहे. अगदी रात्रीच कांदलगाव येथे वाळूचा भलामोठा साठा वनविभागाच्या अधिकाऱ्यांनी पकडला. बिचाऱ्यांना अजून पोलिस व महसूल यंत्रणेने विचारात व सोबत घेतले नसेल किंवा हे अधिकारी, कर्मचारी खरोखरच वन विभागाच्या हद्दीत काही बरेवाईट घडू न देण्याच्या मानसिकतेचे असतील. पण त्यांनी गुन्हा दाखल केला.
गुन्हा दाखल न झालेला किस्सा असा की, ज्यांना वाळू वाहतूकीचे पोलिस अभय कार्ड नाही त्यांना वाहतुक करु द्यायची नाही असा पायंडा इंदापूर पोलीसांचा आहे. त्यातूनच एखादे वाळूचे वाहन चुकून जात असेल आणि जर पोलीसांच्या निदर्शनास आले तर, लागलीच त्या गाडीला पकडून त्याच्यावर खटला दाखल करण्याची धमकी देत दबाव आणून व्यवहार घडवले जातात.
२१ सप्टेंबर रोजी सरडेवाडी टोल नाका येथे मास्क न वापरणाऱ्यांवर कारवाई सुरू होती. या कारवाई करणाऱ्या एका पोलिसाच्या तीक्ष्ण नजरेने पुणे सोलापूर राष्ट्रीय महामार्गावर पहाटे वाळूची गाडी हेरली. या गाडीचे रिचार्ज संपले होते. महिना उलटून गेला तरी त्याने मासिक पोलिस अभय कार्ड घेतले नसल्याचे दिसताच त्याने ती गाडी इंदापूर पोलीस ठाण्यासमोरील जुन्या कृषी उत्पन्न बाजार समितीमध्ये कोणाच्याही नजरेत पडणार नाही अशी आडोश्याला आणून लावली.
सबंधित मालकाला आता मोठा खटला दाखल करणार अशी धमकी त्याने दिली आणि त्यानंतर जे व्हायचे तेच झाले. तोडपाणी ठरून रक्कम ठरली आणि त्याच दिवशी दुपारनंतर ती गाडी सोडून दिली.
दरम्यान काही पत्रकारांना या वाळूच्या ट्रकबाबत सुगावा लागला. त्यांनी मार्केट कमिटीचा भाग पिंजून काढून आडोशाला लावलेली गाडीही शोधून काढली. त्यानंतर सदर गाडीवर कारवाई करण्यात येणार असल्याची माहीती सुत्रांकडून मिळाली देखील. पण बराच वेळ गेल्याने ती गाडी त्याच ठिकाणी आहे का? याची खातरजमा करण्यासाठी बाजार समितीत पाहणी केली असता, ती गाडी त्या ठिकाणी दिसून आली नाही.
इंदापूर पोलीस ठाण्यात याबाबत पुन्हा चौकशी केली असता या गाडीबाबत केलेल्या कारवाई ची कसली नोंद नाही असे सांगण्यात आले. तेव्हा मात्र राजाला दिवाळी माहितीच नाही असा प्रकार निदर्शनास आला.
एका वाळू उपसा करणाऱ्याने आमच्याकडून प्रती ट्रॅक्टर 25 हजार रुपये प्रति महीनाप्रमाणे पैसे घेतले जातात. आमच्या ग्रुपचे शंभर ट्रॅक्टर चालू आहेत. ते कार्ड आम्हाला घ्यावेच लागते आणि महिना उलटायच्या आतच रिचार्ज घ्यावे लागते अशी माहिती दिली.
