बारामती : महान्यूज लाईव्ह
इंदापूर तालुक्यातील अंथुर्णे येथे राष्ट्रवादी काँग्रेस शरदचंद्र पवार पक्षाच्या समर्थकाला शिवीगाळ करतानाचा इंदापूरचे आमदार दत्तात्रय भरणे यांचा कथित व्हिडिओ आज राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी ट्विट केला आहे. या व्हिडिओमुळे खळबळ उडाली आहे. विशेष म्हणजे रोहित पवार यांनी ट्विट केलेल्या व्हिडिओ व्यतिरिक्त भरणे यांचा आणखी एक व्हिडिओ व्हायरल होत आहे.
हा व्हिडिओ इंदापूर तालुक्यातील अंथुर्णे येथील असल्याचे सांगितले जात असून, यामध्ये आमदार दत्तात्रय भरणे हे संबंधित व्यक्तीला आज संध्याकाळी सहा नंतर तुला वाचवायला कोणीही येणार नाही मीच असणार आहे, अशा स्वरूपात सांगतानाच त्याला शिवीगाळ करताना दिसत आहेत, तसेच त्यांचा समर्थकही या व्यक्तीस बोलत असल्याचा हा व्हिडिओ सध्या व्हायरल झाला आहे.
रोहित पवार यांनी केलेले ट्विट..
रोहित पवार यांनी केलेल्या ट्विटवर रोहित पवार असे म्हणाले की, केवळ दडपशाहीपुढं न झुकता स्वाभिमानाने बुथवर काम करणाऱ्या कार्यकर्त्यांना अजितदादा मित्र मंडळाचे सदस्य, माजी मंत्री आणि इंदापूरचे आमदार हे कशा अर्वाच्च भाषेत शिवीगाळ करतात आणि धमकी देतात ते या व्हिडिओत बघा… विशेष म्हणजे ज्यांच्याशी ते असं वागतात ही त्यांचीच भावकी आणि बारा बलुतेदारांपैकी एक आहेत… ही चिडचिड खूप काही सांगून जाते. पण आजच्या लढाईत स्वाभिमानी कार्यकर्ता आणि मतदार कोणत्याही धमक्यांना आणि दपडशाहीला भीक घालणार नाही!
हा व्हिडिओ व्हायरल झाल्याने राजकीय वर्तुळात खळबळ उडाली असून, आता याला दत्तात्रय भरणे काय उत्तर देतात हे पाहणे महत्त्वाचे ठरणार आहे. आज पहाटे देखील रोहित पवार यांनी भोर तालुक्यात काही ठिकाणी पैसे वाटतानाचे कथित व्हिडिओ ट्विट केले आहेत. त्यावर उपमुख्यमंत्री अजित पवार यांनी देखील प्रतिक्रिया व्यक्त करत रोहित पवार यांच्यावर टीका केली होती.
आणखीही एक व्हिडिओ सोशल मिडियावर व्हायरल!
आणखी एक व्हिडिओ सोशल मीडियावर व्हायरल होत असून तोही आवाज दत्तात्रय भरणे यांचा असल्याचे सांगितले जात आहे. या ठिकाणी देखील दत्तात्रय भरणे अशा स्वरूपाची चर्चा आणि वाद उपस्थितांशी करताना दिसत आहेत. या सगळ्या परिस्थितीमध्ये निवडणूक आयोग काय भूमिका घेणार याकडेही सर्वांचे लक्ष लागले आहे.
