राज्याचे उपमुख्यमंत्री अजित पवार यांची भावनिक साद!
राजेंद्र झेंडे, महान्युज लाईव्ह
दौंड : पंतप्रधान नरेंद्र मोदी यांनी जम्मू-काश्मीर मधले 370 कलम हटवलं, भव्य दिव्य रामलल्लाचे मंदिर उभं केले. देशाला जागतिक लेव्हला पाचव्या क्रमांकावर नेऊन ठेवले आहे. जगात देशाला तीन क्रमांकावर नेऊन प्रगती पथावर नेण्यासाठी कणखर नेतृत्वाची गरज आहे. ही निवडणूक राहुल गांधी सोनिया गांधी विरुद्ध नरेंद्र मोदी, अमित शहा आहे. त्यामुळे नरेंद्र मोदी यांना तिसऱ्यांदा पंतप्रधान करण्यासाठी महायुतीला विजयी करा, असे आवाहन राज्याचे उपमुख्यमंत्री अजित पवार यांनी केले.
बारामती लोकसभा मतदारसंघाचे महायुतीचे उमेदवार सुनेत्रा पवार त्यांच्या प्रचारार्थ आणि भाजप आमदार राहुल कुल यांच्या नेतृत्वाखाली भाजप कार्यकर्त्यांचा मेळावा दौंड तालुक्यातील चौफुला (बोरीपार्धी )येथे गुरुवारी (दि. २५) पार पडला. यावेळी उपस्थित कार्यकर्त्यांना मार्गदर्शन करताना राज्याचे उपमुख्यमंत्री अजित पवार बोलत होते. यावेळी दौंड चे आमदार राहुल कुल, भाजपचे जिल्हाध्यक्ष वासुदेव काळे, कांचन कुल, प्रेमसुख कटारिया यांच्यासह इतरही मान्यवर उपस्थित होते.
ते म्हणाले की, मी राष्ट्रवादीत होतो. भाजपच्या विरोधात होतो. १९८७ पासून मी काम करत आहे. साहेब सांगतील तसे आजपर्यंत ऐकलं. ते म्हणतात तीच पूर्व दिशा होती. ते म्हणाले युती करा, केली! ते म्हणाले बाहेर पडा, पडलो! तुम्ही जो आदेश दिला, तो पाळला. वडील म्हातारा झाला, तर पोराच्या हातात कारभार देतो. मग आता तुमचे वय झाले आहे, तर माझ्या हातात का दिला नाही ? असा प्रश्न अजित पवार यांनी शरद पवार यांचे नाव नाव घेता उपस्थित केला.
चार दिवस सासूचे चार दिवस सुनेचे अशा शब्दात त्यांनी शरद पवार यांचे नाव न घेता टीका केली. दहा वर्षात मोदींनी कणखर भूमिका घेत देशाला पुढे नेले आहे. महायुती सरकार सत्तेवर आल्यानंतर 300 युनिट पर्यंत मोफत वीज गरिबांना देणार आहे, 80 कोटी गरिबांना मोफत धान्य दिले आहे. तीन कोटी गोरगरिबांना घरे बांधून देणार आहे. देशाचा विकास झाला, तर राज्याचा विकास होणार आहे. ही निवडणूक बारामतीची नाही तर देशाची आहे. दौंडमध्ये मी बारामतीसारखा विकास करणार आहे.
दौंडमध्ये शैक्षणिक सुविधा उपलब्ध करणार आहे, रेल्वेचा प्रश्न सोडवणार आहे. मूलभूत रस्ते , उड्डाणपुले तसेच दौंड इंदापूर, बारामती तालुक्यातील शेतकऱ्यांना मुळशी धरणाचे पाणी शेतीसाठी आणण्याचा आमचा प्रयत्न आहे. आचारसंहिता संपली की तत्काळ ही कामे मार्गी लावणार आहे. असा विश्वास अजित पवार यांनी यावेळी बोलताना दिला.
आमदार राहुल कुल रडले…
दौंड भाजपचे आमदार राहुल कुल आपले मनोगत व्यक्त करत असताना त्यांचे वडील स्वर्गीय सुभाष कुल यांची आठवण आल्याने त्यांच्या डोळ्यातून अश्रू आले आणि ते काही वेळ भावूक झाले. अजित पवार कुल यांच्या जवळ येत पाठीवर थाप देऊन आधार दिला. आमदार कुल यांनी दौंड मधून महायुतीच्या उमेदवार सुनेत्रा पवार यांना भरघोस मताधिक्य देण्यासाठी प्रयत्न करणार आहे. अशी ग्वाही कुल यांनी अजित पवार यांना दिली.
