खंडाळा : महान्यूज लाईव्ह
पती-पत्नीत आली बाहेरवाली तिसरी …पत्नी बोलली, तू घरीच का आली? मग पतीने चक्क पत्नीलाच चाकूने भोकसून गंभीर दुखापत केल्याची घटना शिरवळ येथील शिर्के काँलनी परिसरात घडली आहे. या घटनेमध्ये पत्नी व तिच्या आईसह तिघेजण जखमी झाले असून या घटनेमुळे शिरवळ परिसरात खळबळ उडाली आहे. याप्रकरणी शिरवळ पोलीस स्टेशनला पतीसह बाहेरवालीविरुध्द शिरवळ पोलीस स्टेशनला गुन्हा दाखल करण्यात आला आहे.
याबाबतची शिरवळ पोलीसांनी दिलेली माहिती अशी की, शिंदेवाडी (ता.भोर जि.पुणे) येथील संदिप दिलीप गिरी (वय 35) हे कुंटूंबियासमवेत राहायला आहेत. दरम्यान, मंगळवार दि.15 रोजी संदिप गिरी यांची बहिण वनिता काळूराम वचकल (मूळ रा.वीर ता.पुरंदर जि.पुणे सध्या रा.शिरवळ ता.खंडाळा) ही पतीसमवेत शिरवळ येथील शिर्के काँलनीमध्ये राहण्याकरीता आहेत. यावेळी काळूराम वचकल याने प्रेमसंबंधातून पाचवड ता.वाई) येथील महिलेला घरी आणले. त्यामुळे पती काळूराम वचकल हा पत्नी वनिता हिला शिवीगाळ, दमदाटी करु लागला. त्यामुळे वनिता हिने भाऊ संदिप गिरी याला दुरध्वनीद्वारे बोलावून घेतले असता संदिप गिरी हा कुंटूंबियासमवेत येत बहिण वनिता हिला घेऊन पतीविरुध्द शिरवळ पोलीस स्टेशनला तक्रार दाखल केली.
यादरम्यान तक्रार नोंदविल्यानंतर वनिता वचकल ही कुंटूबियांसमवेत शिर्के काँलनी याठिकाणी कपडे आणायला गेली असता, त्याठिकाणी घरामध्ये पाचवड येथील संबंधित महिला ही दिसल्यानंतर वनिता वचकल हिने या महिलेला तू येथे कशाला आली आहेस? असे म्हटल्यावर पती काळूराम वचकल याला राग आला.
त्याने घरामधील स्वयंपाकघरातील चाकू आणत पत्नी वनिता वचकल हिच्यावर चाकूने वार करीत गंभीर जखमी केले. यावेळी भांडणे सोडविण्यासाठी वनिता वचकल यांच्या आई शोभा गिरी यांनी मध्यस्थी केली, तर शोभा यांच्यावर पाचवीच्या महिलेने दुस-या चाकूने हल्ला करीत गंभीर जखमी केले.
संदिप गिरी यांना काळूराम वचकल याने ढकलून दिल्याने संदिप गिरी हेही जखमी झाले. दरम्यान, गंभीर जखमी झालेल्या संबंधितांना शिरवळ येथील खाजगी रुग्णालयामध्ये दाखल करण्यात आले आहे. या अचानकपणे घडलेल्या घटनेमुळे शिर्के कॉलनी परिसरात गोंधळाची परिस्थिती निर्माण झाली होती. याप्रकरणी अदयापपर्यंत कोणालाही अटक करण्यात आलेली नाही. याबाबतची फिर्याद संदिप गिरी यांनी शिरवळ पोलीस स्टेशनला दिली असून अधिक तपास पोलीस हवालदार संजय पंडित हे करीत आहेत.
