विशाल कदम : महान्यूज लाईव्ह
उरुळी कांचन : पूर्व हवेलीतील कोरेगाव मूळ, वळती, शिंदवणे, पेठ, व परिसरातील गावांमधील शेतकर्यांनी महाराष्ट्र राज्य रस्ते विकास महामंडळाच्या (एमएसआरडीसी) रिंगरोडला तीव्र विरोध दर्शविला आहे. प्रस्तावित रिंगरोड जर शेतकर्यांच्या शेतातून गेला तर पुणे – सोलापूर महामार्ग अडविण्यात येणार असल्याचा इशाराही यावेळी पूर्व हवेलीतील शेतकर्यांनी दिला.
कोरेगाव मूळ आणि शिंदवणे (ता. हवेली) येथे प्रकल्पबाधित शेतकर्यांची आणि प्रशासकीय अधिकारी यांच्यात रविवारी (ता. १३ ) संवाद सभेचे आयोजन करण्यात आले होते. यावेळी हा हवेलीचे उपविभागीय अधिकारी सचिन बारवकर, एमएसआरडीसीचे अभियंता संदीप पाटील, हवेलीच्या तहसिलदार तृप्ती कोलते, अप्पर तहसिलदार विजयकुमार चोबे, आणि मंडलधिकारी दीपक चव्हाण उपस्थित होते. यासभेमध्ये पूर्व हवेलीतील शेतकर्यांनी एमएसआरडीसीच्या रिंगरोड च्या संदर्भात विरोधाची आक्रमक भूमिका मांडली.
प्रशासकीय अधिकार्यांनी शेतकर्यांना रिंगरोडची माहिती व भूसंपादनाची प्रक्रिया या संदर्भात जमलेल्या शेतकर्यांना माहिती दिली. यावेळी रिंगरोडला विरोध दर्शविणार्या शेतकर्यांच्या अडचनींचे निरसण करण्यात आले. तसेच पूर्व हवेलीतील भूसंपादनाचे काम दिवाळीपर्यंत पूर्ण करण्याचे उद्दीष्ट रस्ते विकास महामंडळाने करण्याचे ठरविले आहे. परंतु प्रशासनाने शेतकर्यांना विश्वासात न घेता फेरफारवर नोंद केल्यामुळे रिंगरोडला काही शेतकर्यांनी तीव्र विरोध दर्शविला.
याबाबत अधिक माहिती देताना बारवकर म्हणाले की, एमएसआरडीसीच्या रिंगरोड
भूसंपादनाच्या प्रक्रियाला शेतकर्यांनी सहकार्य करावे. जे शेतकरी भूसंपादन प्रक्रियाला विरोध दर्शवतील त्यांना रेडिरेकनरच्या चारपट मोबदला दिला जाणार आहे. आणि विरोध न दर्शविणार्या शेतकर्यांना पाचपट मोबदला देण्यात येणार असल्याचे हवेलीचे उपविभागीय अधिकारी सचिन बारवकर यांनी संगितले.
यावेळी पेठचे सरपंच सूरज चौधरी, शिंदवणे गावाचे माजी सरपंच आण्णा महाडीक, जनार्दन कुंजीर, प्रभाकर चौधरी, गोकुळ कुंजीर, संदीप कानकाटे, मारुती चौधरी, पेठचे सरपंच सूरज चौधरी, कोरेगाव मूळचे सरपंच विठ्ठल शितोळे, उपसरपंच मनीषा कड, अशोक इनामदार, दिलीप शितोळे, बापू शितोळे, विठ्ठल कोलते, भानूदास जेथे, रघुनाथ चौधरी, पोलिस पाटील वर्षा कड, दत्तात्रय चौधरी आणि शेतकरी मोठ्या संख्येने उपस्थित होते.
दरम्यान, पूर्व हवेलीतून एमएसआरडीसीचा रिंगरोड सुमारे १०३ किलोमीटर लांबीचा रिंग रोड तब्बल ८२५ हेक्टर जागेमधून जाणार आहे. परंतु, पूर्व हवेलीतून याअगोदरच पी.एम.आर.डी.ए. आणि सार्वजनिक बांधकाम विभागाच्या वतीने असे दोन रिंगरोड प्रस्तावित केले आहेत. ते दोन्ही रस्ते सुरू झाल्यास या तिसर्या रिंगरोडची गरज पडणार नाही. असे काही शेतकऱ्यांनी या चर्चेत बोलताना आपले मत मांडले.
