बारामती : महान्यूज लाईव्ह
मागील काही दिवसांत राज्यात सत्ता उपभोगलेले नेते खास फोटोसेशन करीत पीएम फंडाला मदत देण्याचे आवाहन करीत होते, पीएम फंडाला मदत देण्यासाठी कोणाचीच ना नाही, पण पीएम फंडाबरोबर कोरोनात अक्षरशः रुतलेल्या स्वतःच्या महाराष्ट्रातही सीएम फंडाला मदत करावी असे आवाहन करावे असे कोणालाच वाटले नाही, त्यातून राज्यात सर्वसामान्यांत रोष असतानाच बळीराजाची लेकरं मात्र राज्याच्या मदतीला धावून आली आहेत…अनेकजण नोकरी करीत नसूनही त्यांनी आपल्या कमाईचा क्षमतेनुसार वाटा देत राज्य़ाच्या मुख्यमंत्री फंडाला चक्क ६२ हजार २२२ रूपयांची मदत केली. सन २००५ ते २००९ या कालावधीत बारामतीत बीएस्सी अॅग्री शिकलेल्या पोरांनी ही मदत केली.
बारामती अॅग्रीकल्चरल डेव्हलपमेंट ट्रस्टच्या शारदानगर येथील कृषी महाविद्यालयात ही मुले सन २००५ ते २००९ या कालावधीत शेती पदवीचे शिक्षण घेत होते. सध्या राज्य कोरोनाच्या संकटातून जात असताना राज्याला मदतीचा हात या मुलांनी पुढे केला आहे. सध्याच्या लॉकडाऊनच्या काळात राज्यातील परिस्थितीने अस्वस्थ झालेली ही बळीराजाची लेकरं फोनच्या माध्यमातून एकमेकांच्या संपर्कात आली. याच दरम्यान राज्यावरील सध्याच्या संकटात राज्याला मदतनिधीची गरज असल्याचे आवाहन आमदार रोहित पवार यांनी केले होते. त्यास प्रतिसाद देत विद्यार्थ्यांनी निधी जमा करण्याचा संकल्प केला. अल्पावधीतच ही रक्कम ६२ हजार २२२ रुपयांवर पोचली. या माजी विद्यार्थ्यांनी स्वयंस्फूर्तीने एकत्र येऊन महाराष्ट्र सरकारला कोरोनाविरोधात लढ्यासाठी ६२ हजार रुपयांचा निधी दिला हे फार मोठे कौतुक आहे.यातील अनेक विद्यार्थी नोकरीऐवजी शेतात राहूनच शेतीची सेवा करीत आहेत. त्यामुळेच आमदार रोहित पवार यांच्या कानावर विद्यार्थ्यांच्या प्रतिनिधीने ही बाब घातली आणि तुमच्या आवाहनानुसार आम्ही हा निर्णय घेतल्याचे सांगितले, तेव्हा शेती आणि शेतकरी कधीही आपल्या मातीवरील संकटात दूर जात नाहीत, ते आपल्या मातीतील संकटाचा मुकाबला एकत्रितरित्या करतात हेच नव्या पिढीने दाखवून दिले अशा शब्दांत पवार यांनी कौतुक केले.
