बारामती : महान्यूज लाईव्ह
कोरोनाच्या लॉकडाऊनच्या काळात सारेच घरी बसलेत…आणि तरीदेखील सर्वजण एकमेकांच्या संपर्कात आहेत… अशावेळी झूम अॅपच्या माध्यमातून आज बारामतीत सांजवेळी मैफल अवतरली..आणि बासरीवादक हिमांशू बक्शी यांनी सादर केलेल्या सांज ये गोकुळीने पुन्हा एकदा शहरात आलेल्या व घरबंद झालेल्या सर्वांच्या नजरेसमोर समृध्द `गावगाडा` अवतरला..त्याचवेळी `हर घडी बदल रही है रुप जिंदगी` चे सूर कानी पडताच पुन्हा एकदा जगभरातले कोरोनामुळे पालटलेले रुप डोळ्यासमोर आले..!
आज संध्याकाळी सहा वाजता स्त्रीरोगतज्ज्ञ डॉ. राजेश कोकरे यांच्या पुढाकारातून `लॉकडाऊन मीट` या व्हाटसअप ग्रुपमधील सहकाऱ्यांसाठी ही अनोखी मैफल आयोजित करण्यात आली. सध्या व्याख्यानमालांपासून ते वेगवेगळे संवाद फेसबुक, झुम अॅपवरून सुरू आहेत. अशावेळी साहित्याची, कवितांची, गाण्यांची रुची असलेले तरी मागे कसे राहतील..किंबहूना त्यांना ही बौध्दीक, मनोरंजक मेजवानी मिळण्यासाठीच सध्या बारामतीत हा ग्रुप कार्यरत आहे.
कोरोनाने देऊळबंद केलंय, घरबंद केलेल्या माणसांसाठी हिमांशू `किसी की मुस्कराहटो पे हो निसार` हे राज कपूर यांच्या चित्रपटातील गाणे सादर करीत होते, तेव्हा बारामतीच्या साहित्यनगरीतील ही मैफल एकमेकांना आधार देण्यासाठी पुरेशी असल्याचा भास निर्माण झाला..हिमांशू यांच्या बासरीवादनाने “तुमसेही दिन होता है..सूरमयी शाम आती है..तुमसेही तुमसेही` जाने जां ढूंढता फिर रहा हूँ तुम्हें रात दिन मैं यहाँ से वहाँ` सारख्या प्रेमगीतांपासून ते `विठ्ठला तू वेडा कुंभार` सारख्या भावगीतांपर्यंत ही मैफल उत्तरोत्तर रंगत गेली..बारामतीत ही मैफल दररोज संध्याकाळी होणार असल्याचे डॉ. कोकरे यांनी सांगितले.
हिमांशू सांगत होते,` वडीलही गायक होते. मात्र त्यांना मार्गदर्शन मिळाले नाही, मला मात्र राजेंद्र कुलकर्णी यांनी शिकवले. सध्या मी शास्त्रीय संगीत शिकतो आहे.`
