सोमेश्वरनगर : महान्यूज लाईव्ह
श्री सोमेश्वर सहकारी साखर कारखान्याच्या निवडणुकीत उमेदवारी अर्ज मागे घेण्याच्या अंतिम मुदतीनंतर निवडणुकीचे चित्र स्पष्ट झाले आहे. कारखान्याच्या २१ जागांसाठी सुरुवातीला तब्बल ६०१ उमेदवारी अर्ज दाखल झाले होते. छाननीनंतर ५१४ उमेदवारांचे अर्ज पात्र ठरले. मात्र, ३० सप्टेंबर रोजी अर्ज मागे घेण्याच्या अंतिम मुदतीपर्यंत तब्बल ४३१ उमेदवारांनी माघार घेतली. त्यामुळे आता निवडणुकीच्या रिंगणात ८३ उमेदवार राहिले आहेत.
श्री सोमेश्वर सहकारी साखर कारखान्याच्या निवडणुकीची रणधुमाळी आता अधिकृतपणे रंगण्यास सुरुवात झाली आहे. कारखान्याच्या २१ संचालक पदांच्या जागांसाठी मोठ्या प्रमाणात उमेदवारी अर्ज दाखल झाल्याने सुरुवातीपासूनच या निवडणुकीकडे सभासद आणि राजकीय वर्तुळाचे लक्ष लागले होते. निवडणूक प्रक्रियेत एकूण ६०१ उमेदवारी अर्ज दाखल झाले होते. त्यानंतर झालेल्या छाननीमध्ये ५१४ उमेदवारांचे अर्ज पात्र ठरले. अर्ज मागे घेण्यासाठी ३० सप्टेंबर ही अंतिम तारीख निश्चित करण्यात आली होती.
अर्ज माघारीच्या शेवटच्या टप्प्यात अनेक इच्छुकांनी निवडणुकीतून माघार घेतली. तब्बल ४३१ उमेदवारांनी आपले उमेदवारी अर्ज मागे घेतले. त्यामुळे आता ८३ उमेदवार प्रत्यक्ष निवडणूक रिंगणात राहिले आहेत, अशी माहिती निवडणूक निर्णय अधिकारी यांनी दिली.
उमेदवारांची संख्या मोठ्या प्रमाणात कमी झाल्याने आता कारखाना निवडणुकीतील प्रत्यक्ष लढतीचे चित्र स्पष्ट होऊ लागले आहे.
दरम्यान, उमेदवारी अर्ज माघारीची प्रक्रिया पूर्ण झाल्याने आगामी काळात प्रचाराला वेग येण्याची शक्यता आहे. सभासदांच्या गाठीभेटी, बैठका, मेळावे आणि प्रचाराच्या माध्यमातून उमेदवारांकडून मतदारांपर्यंत पोहोचण्याचे प्रयत्न सुरू होणार आहेत.
त्यामुळे सोमेश्वर सहकारी साखर कारखान्याच्या २१ जागांसाठी ८३ उमेदवारांमध्ये होणारी निवडणूक आता अधिक रंगतदार होण्याची शक्यता असून, अंतिम निकालाकडे सभासदांचे लक्ष लागले आहे.
