दौलतराव पिसाळ, सातारा : सातारा जिल्हा मध्यवर्ती सहकारी बँकेची वार्षिक सर्वसाधारण सभा रविवारी पार पडली; मात्र बँकेच्या कारभारापेक्षा सभेच्या निमित्ताने समोर आलेल्या राजकीय चित्राचीच जिल्ह्यात अधिक चर्चा रंगली. खासदार श्रीमंत छत्रपती उदयनराजे भोसले आणि विधान परिषदेचे माजी सभापती श्रीमंत रामराजे नाईक निंबाळकर हे दोन प्रमुख राजकीय चेहरे एकाच व्यासपीठावर आले आणि त्यांच्यातील सलोख्याचे दर्शन घडल्याने जिल्ह्याच्या राजकारणात त्याचे वेगवेगळे अर्थ काढले जाऊ लागले आहेत.
दोन्ही नेत्यांची व्यासपीठाकडे झालेली एकत्रित ‘एन्ट्री’ विशेष लक्षवेधी ठरली. लिफ्टमधून दोघे सोबत आल्याचे दृश्य उपस्थितांच्या नजरेत भरले. त्यानंतर व्यासपीठावर पोहोचल्यावर उदयनराजेंनी आपल्याकडील चाफ्याचे फूल रामराजेंना दिले. दोघेही शेजारी बसले आणि पुढील बराच वेळ त्यांच्यातील गप्पा, हास्यविनोद आणि अनौपचारिक संवाद सुरू राहिला. त्यामुळे बँकेच्या सभेतील राजकीय ‘मूड’ जाणून घेण्यासाठी उपस्थितांचे लक्ष वारंवार या दोन्ही नेत्यांकडे वळत होते.
रामराजेंच्या मिश्कील वक्तव्याने सभागृहात हशा..
सभेतील आपल्या भाषणात रामराजे नाईक निंबाळकर यांनी उदयनराजेंचा उल्लेख करत वातावरण आणखी हलकेफुलके केले. बँकेचे सरव्यवस्थापक सरकाळे यांनी खासदार उदयनराजे यांच्याकडून बँकेच्या कामकाजाला कोणताही त्रास नसल्याचे सांगितले होते. त्यावर रामराजेंनी आपल्या नेहमीच्या मिश्कील शैलीत, “त्यांचा बँकेला त्रास नसला, तरी ते नुसते दिसले तरी त्रास होतो,” अशी टिप्पणी केली. या वक्तव्याने सभागृहात चांगलाच हशा पिकला.
उदयनराजेंबाबत बोलण्याचा आपला अधिकार आणि ज्येष्ठत्वाचा संदर्भ देत रामराजेंनी दोन्ही कुटुंबांमधील राजकीय संबंधांची एक वेगळीच छटा सभागृहासमोर आणल्याचे मानले जात आहे. दरम्यान, आगामी जिल्हा बँक निवडणुकीच्या पार्श्वभूमीवर रामराजेंनी केलेले भाष्य अधिक महत्त्वाचे ठरले. “जिल्हा बँकेच्या निवडणुकीची मला भीती नाही,” असे स्पष्ट शब्दांत सांगत त्यांनी जिल्हा बँकेची देशातील ‘ब्रँड बँक’ अशी ओळख असल्याचे नमूद केले.
निवडणुकीच्या रणधुमाळीत सभासदांची पळवापळवी होऊ नये, अशी अपेक्षाही त्यांनी व्यक्त केली. सध्याचे संचालक मंडळ कायम राहावे, अशी काही सभासदांची इच्छा असल्याचेही त्यांनी सांगितले. त्यामुळे बँकेच्या आगामी निवडणुकीत सध्याची राजकीय समीकरणे कायम राहणार की नव्या आघाड्या आकाराला येणार, याबाबत चर्चांना सुरुवात झाली आहे.
‘जिल्हा बँक’ ठरणार राजकीय शक्तिपरीक्षेचे व्यासपीठ?
सातारा जिल्ह्याच्या राजकारणात जिल्हा मध्यवर्ती बँकेला केवळ आर्थिक संस्था म्हणून नव्हे, तर ग्रामीण भागातील राजकीय प्रभावाचे महत्त्वाचे केंद्र म्हणूनही पाहिले जाते. त्यामुळे आगामी निवडणुकीच्या आधी बँकेच्या व्यासपीठावर दोन प्रभावशाली नेत्यांमध्ये दिसलेला सुसंवाद राजकीयदृष्ट्या दुर्लक्ष करण्यासारखा नाही. विशेषतः उदयनराजे भोसले आणि रामराजे नाईक निंबाळकर यांच्यातील सार्वजनिक संवाद, एकत्रित प्रवेश, चाफ्याच्या फुलाची देवाणघेवाण आणि सभेदरम्यानचा अनौपचारिक संवाद यामुळे सातारा जिल्ह्यातील राजकीय वर्तुळात नव्या चर्चांना तोंड फुटले आहे.
सभेचा विषय सहकार आणि बँकेच्या कारभाराचा असला, तरी प्रत्यक्षात राजकीय निरीक्षकांचे लक्ष मात्र आगामी निवडणुकीच्या समीकरणांकडे लागले होते. त्यामुळे जिल्हा बँकेची ही सभा संपली असली, तरी तिच्या निमित्ताने उमटलेले राजकीय संकेत आगामी काळात किती परिणामकारक ठरतात, याकडे सातारा जिल्ह्याचे लक्ष लागले आहे.
