बारामती : जिद्द, सातत्य आणि शिस्तबद्ध अभ्यासाच्या जोरावर स्पर्धा परीक्षेच्या क्षेत्रात उल्लेखनीय यश मिळवणारे शुभम संभाजी ढोक यांची केंद्रीय लोकसेवा आयोगाच्या (UPSC) परीक्षेच्या माध्यमातून भारत सरकारच्या गृह मंत्रालयात सेक्शन ऑफिसर पदावर निवड झाली आहे.
फलटण तालुक्यातील टाकळवाडी हे शुभम यांचे मूळ गाव. शिक्षक वडील आणि गृहिणी आई अशा साध्या कुटुंबातून आलेल्या शुभम यांनी कोणतीही परिस्थिती आपल्या ध्येयाच्या आड येऊ न देता स्पर्धा परीक्षेच्या तयारीला सातत्याने प्राधान्य दिले. अनेक वर्षांच्या परिश्रमाचे फळ म्हणून त्यांनी केंद्र सरकारमधील महत्त्वाची जबाबदारी मिळवली आहे.
शुभम यांनी सन २०२१ पासून बारामतीत रोहिदास बिनवडे यांच्या ट्रिक्स अभ्यासिकेत नियमितपणे अभ्यास केला. UPSCची तयारी अधिक व्यापक करण्यासाठी त्यांनी दिल्ली येथेही मार्गदर्शन घेतले. मात्र, त्यानंतर पुन्हा ट्रिक्स अभ्यासिकेत परतत त्यांनी आपल्या अभ्यासाचे सातत्य कायम ठेवले. नियोजनबद्ध अभ्यास, वेळेचे भान आणि ध्येयाप्रती असलेली निष्ठा ही त्यांच्या तयारीची प्रमुख वैशिष्ट्ये ठरली.
अभ्यासाच्या या प्रवासात शुभम यांना केवळ स्वतःच्या यशाचा ध्यास नव्हता, तर त्यांच्या मित्रपरिवारासोबतही त्यांनी अभ्यासाची सकारात्मक संस्कृती निर्माण केली. त्यांच्या अभ्यासगटातील अनेक विद्यार्थ्यांनी विविध स्पर्धा परीक्षांमध्ये यश मिळवले आहे. त्यामुळे परस्परांना प्रोत्साहन देत, अडचणींवर चर्चा करत आणि एकमेकांच्या यशाचा आनंद साजरा करणारा हा समूह अनेक विद्यार्थ्यांसाठी प्रेरणादायी ठरला आहे.
दरम्यान, सेक्शन ऑफिसरपदावर झालेल्या निवडीनंतर शुभम यांचे UPSC परीक्षेत सर्वोच्च स्थान मिळवण्याचे स्वप्न असून त्यासाठी पुढील काळातही तयारी सुरू ठेवण्याचा त्यांचा निर्धार आहे. शुभम यांच्या यशामुळे सातत्यपूर्ण मेहनत, योग्य मार्गदर्शन आणि ध्येयासाठीची जिद्द यांचा योग्य संगम झाल्यास यश निश्चित मिळू शकते, हा संदेश पुन्हा अधोरेखित झाला आहे. त्यांच्या यशाबद्दल मित्र, शिक्षक आणि ट्रिक्स अभ्यासिकेतील सहकाऱ्यांनी अभिनंदन करत, भविष्यात UPSCमध्ये आणखी मोठे यश संपादन करतील, असा विश्वास व्यक्त केला.
