बारामती : महान्यूज लाईव्ह
शहरातील वाढत्या वाहन चोरी, घरफोडी आणि चैन स्नॅचिंगसारख्या गुन्ह्यांवर प्रभावी नियंत्रण मिळवण्यासाठी बारामती शहर पोलिसांनी नागरिक, ग्रामपंचायती, हौसिंग सोसायट्या आणि व्यापारी बांधवांना सीसीटीव्ही कॅमेरे बसविण्याचे महत्त्वपूर्ण आवाहन केले आहे.
अपर पोलीस अधीक्षक गणेश बिरादार व उपविभागीय पोलीस अधिकारी डॉ. सुदर्शन राठोड यांच्या मार्गदर्शनाखाली शहर पोलिसांकडून नाकाबंदी, वाहन तपासणी, रात्रीची गस्त आणि गुन्हे प्रतिबंधात्मक कारवाया सातत्याने राबविल्या जात आहेत. मात्र, आधुनिक गुन्हेगारीच्या बदलत्या पद्धतींमुळे सीसीटीव्ही नेटवर्कची गरज अधिक तीव्र झाली असल्याचे पोलीस निरीक्षक श्रीशैल्य चिवडशेट्टी यांनी स्पष्ट केले आहे.
चोरटे मुख्य रस्ते टाळून गल्ल्या, बोळ, वस्ती भाग आणि कमी वर्दळीच्या ठिकाणांचा वापर करून गुन्हे करीत असल्याने आरोपींचा मागोवा घेण्यासाठी सीसीटीव्ही कॅमेरे अत्यंत उपयुक्त ठरत आहेत. गुन्ह्यांचा जलद तपास, आरोपींची ओळख आणि चोरीचा मुद्देमाल हस्तगत करण्यासाठी कॅमेऱ्यांची मदत महत्त्वाची ठरत असल्याचे पोलिसांचे म्हणणे आहे.
दरम्यान, गुणवडी गावात संपूर्ण गाव सीसीटीव्ही कव्हरेजखाली आणण्याचा उपक्रम वेगाने सुरू असून, हे इतर गावांसाठी आदर्श उदाहरण ठरत आहे. अशाच प्रकारे मळद, पिंपळी, मेडद, डोरलेवाडी तसेच बारामती शहरातील प्रमुख चौक, रस्ते, प्रवेशद्वारे, बाजारपेठा आणि निवासी भाग सीसीटीव्हीच्या जाळ्यात आणण्याची गरज व्यक्त करण्यात आली आहे.
पोलिसांनी नागरिक, व्यापारी, उद्योग समूह, सामाजिक संस्था आणि हौसिंग सोसायट्यांना आपल्या परिसरात सीसीटीव्ही यंत्रणा उभारण्यासाठी पुढाकार घेण्याचे आवाहन केले आहे. “सीसीटीव्ही हा खर्च नसून कुटुंब, मालमत्ता आणि शहराच्या सुरक्षेतील गुंतवणूक आहे,” असेही पोलिसांनी नमूद केले. पोलीस प्रत्येक ठिकाणी पोहोचू शकतात; पण सीसीटीव्ही प्रत्येक क्षणी पहारा देऊ शकतो. प्रत्येक गल्लीत कॅमेरा, गुन्हेगारांना नाही थारा!” असा संदेश देत बारामती शहर पोलिसांनी नागरिकांच्या सक्रिय सहभागाचे आवाहन केले आहे.
