विशाल कदम:- महान्यूज लाईव्ह
पुणे : राज्यातील सार्वजनिक आरोग्य व्यवस्थेला बळकट करण्यासाठी सार्वजनिक आरोग्य विभागाच्या वतीने राज्यातील शासकीय रुग्णालयांना ४४२ रुग्णवाहिकांचे वितरण आज उपमुख्यमंत्री अजित पवार यांच्या हस्ते करण्यात आले. यावेळी आरोग्यमंत्री राजेश टोपे, जिल्हाधिकारी डॉ. राजेश देशमुख उपस्थित होते.
येथील विभागीय आयुक्त कार्यालयासमोर या रूग्णवाहिकांचे वितरण झाले. उपमुख्यमंत्री व वित्तमंत्री अजित पवार यांनी अर्थसंकल्पात केलेल्या घोषणेनुसार हा निधी मिळाला होता. त्या निधीतून घेतलेल्या ४४२ नवीन रुग्णवाहिकांचे वाटप करण्यात आले.
यामध्ये पुणे विभागातील पुणे जिल्हयासाठी १२, सातारा १३, सोलापूर ९, कोल्हापूर १७ आणि सांगली ९ रुग्णवाहिका आज वितरीत करण्यात आल्या आहेत. यावेळी आरोग्य सेवेचे उपसंचालक डॉक्टर मिलिंद मोरे, डॉक्टर संजोग कदम, जिल्हा शल्य चिकित्सक डॉक्टर अशोक नांदापूरकर जिल्हा परिषदेचे जिल्हा आरोग्य अधिकारी डॉक्टर भगवान पवार यांच्यासह आरोग्य विभागाचे अधिकारी कर्मचारी व टाटा कंपनीचे अधिकारी उपस्थित होते.
ऑक्सिजन कॉन्सट्रेटर आणि ऑक्सिजन जनरेशन प्लॅन्टचे उपमुख्यमंत्र्यांच्या हस्ते लोकार्पण
टाटा कंपनीमार्फत उपलब्ध करुन दिलेल्या ३०० ऑक्सिजन कॉन्सट्रेटर आणि ४ ऑक्सिजन जनरेशन प्लॅन्टचे उपमुख्यमंत्री अजित पवार यांच्या हस्ते विभागीय आयुक्त कार्यालयात लोकार्पण करण्यात आले.
