सुपे : महान्यूज लाईव्ह
कोरोनाच्या प्रादुर्भावामुळे ऑनलाईन शिक्षणाचा पर्याय उपलब्ध झाला आहे. त्यामुळे शिक्षकांवरील कामाचा ताण काही प्रमाणात कमी झाला आहे. ही बाब लक्षात घेत बारामती तालुक्यातील सुपे येथील विद्या प्रतिष्ठान इंग्लिश मिडीयम स्कूलच्या शिक्षक, शिक्षकेतर कर्मचारी आणि पालकांनी एकत्र येत येथील अभयारण्यातील वन्य प्राण्यांसाठी श्रमदानातून पाणवठ्याची निर्मिती केली आहे. त्यामुळे वन्यप्राण्यांची पाण्यासाठीची भटकंती थांबणार आहे. तसेच येथे असंलेल्या झाडांनाही पाण्याची सुविधा उपलब्ध झाली आहे.
ऑनलाईन तासानंतर मिळणारा फावला वेळ सामाजिक कामासाठी देण्याचा निर्णय घेत सुपे येथील विद्या प्रतिष्ठान इंग्लिश मिडीयम स्कूलच्या शिक्षक व शिक्षकेतर कर्मचाऱ्यांनी ज्येष्ठ नेते शरद पवार व प्रतिभाताई पवार यांच्या वाढदिवसाचे औचित्य साधून आगळावेगळा उपक्रम राबवला आहे. येथील छप्पन मेरू मंदिर परिसरात श्रमदानातून पाणवठा तयार केला आहे. वन मंडल अधिकारी अमोल पाचपुते आणि बारामती बाजार समितीच्या संचालिका उषा भोंडवे यांच्या उपस्थितीत हा पाणवठा नुकताच खुला करून त्यामध्ये पाणी सोडण्यात आले.
शाळा, पालक विद्यार्थी व शिक्षकांनी अशा उपक्रमात सक्रीय सहभाग दिल्यास पर्यावरणाचे जपणूक होण्यास मोठी मदत होईल. अशा उपक्रमांसाठी विविध संस्थांनी पुढाकार घ्यावा असे आवाहन अमोल पाचपुते यांनी यावेळी केले.
या उपक्रमात शिक्षकांनी पाणवठ्याच्या आकाराचा खड्डा तयार केला. त्याला पाचट व काळ्या मातीचा थर टाकून त्यावर दगड-गोट्यांचे अस्तरीकरण केले आहे. त्यासाठी वनविभागाचे अधिकारी अमोल पाचपुते, माया काळे, गणपत भोंडवे, सुरेश गायकवाड यांनी मार्गदर्शन केले.
पालकांमधून उषा भोंडवे यांनी पाणवठ्यासाठी आवश्यक साहित्य उपलब्ध करून दिले. तसेच माजी सरपंच मंदा खैरे, दत्तात्रय कदम, नितीन शितोळे, दत्तात्रय शेंडगे यांनी या उपक्रमात सक्रिय सहभाग घेतला. श्रमदानातून शिक्षक, कर्मचारी आणि पालकांनी सुरू केलेल्या या पाणवठ्यामुळे वन्यजीवांच्या पाण्याचा प्रश्न कायमचा निकाली लागला आहे. त्यामुळे या उपक्रमाचे सर्वत्र कौतुक होत आहे.
