शहरातील सरस्वतीनगर येथील घरातून आरोपीस ताब्यात घेऊन हरणास जीवदान दिले
इंदापूर : महान्यूज लाईव्ह
इंदापूर मधील सरस्वती नगर येथे अवैधरित्या घरामध्ये पाय बांधून ठेवलेल्या एक वर्ष वयाच्या चिंकारा जातीच्या लहान हरणाची इंदापूर पोलिसांनी शिताफीने सुटका करत जिवंत हरणाला ताब्यात घेऊन जीवदान दिले आहे. याप्रकरणी परमेश्वर अंकुश काळे (वय 33 वर्षे) रा. सरस्वती नगर (इंदापूर ) यास इंदापूर पोलिसांनी हरणासह ताब्यात घेतले आहे.
याबाबत माहिती अशी, काल शनिवारी आरोपीने आपल्या गोखळी- वडापुरी गावच्या हद्दीत असणाऱ्या शेताजवळ वनीकरणातील चिंकारा हरीन फास्याद्वारे सापळा लावून पकडले. त्यास सकाळी शहरातील सरस्वती नगर भागातील आपल्या घरी आणले. याचा सुगावा इंदापूर पोलिसांना लागताच त्यांनी तातडीने त्याच्या घरी धाव घेतली. पोलिसांनी परमेश्वर काळेस हरणासह ताब्यात घेतले .त्याच्यावर वन्यजीव संरक्षण अधिनियम १९७२ अन्वये गुन्हा दाखल करण्याची प्रक्रिया सुरु आहे. इंदापूरचे वनरक्षक एस. व्ही. गीते यांनी फिर्याद दिली.
या संदर्भात पत्रकारांना माहिती देताना वनपरिक्षेत्र अधिकारी राहूल काळे यांनी सांगितले की,आरोपी काळे याने सरस्वतीनगर येथील आपल्या राहत्या घरी एक वर्षे वयाचे चिंकारा जातीचे हरीण बाळगल्याचा प्रकार इंदापूर पोलीस ठाण्याचे पोलीस निरीक्षक नारायण सारंगकर यांच्यासह इंदापूर पोलीस ठाण्याच्या गुन्हे पथकाचे काकासाहेब पाटोळे, विशाल चौधर, विक्रम जाधव यांनी उघडकीस आणला. जिवंत हरणासह आरोपीस ताब्यात घेतले. हरीण वनविभागाच्या ताब्यात दिले.
आरोपीने अवैधरित्या वन्यजीव स्वतःकडे बाळगले. घरात ठेवले, त्याची वाहतूक केली, यामुळे त्याच्यावर वन्यजीव संरक्षण अधिनियम १९७२ अन्वये कलम ९, ५१,२(१६) अन्वये गुन्हा दाखल करण्याची प्रक्रिया सुरु आहे. या कलमानूसार हा गुन्हा सिध्द झाला, तर आरोपीस ३ ते ७ वर्षांची शिक्षा होवू शकते असे काळे यांनी सांगितले.
आरोपीने या आधी असे कृत्य केले आहे का? हरीण बाळगण्यात त्याचा कोणता हेतू होता? यासंदर्भात पुणे वनविभागाचे उपवनसंरक्षक राहूल पाटील, सहाय्यक उपवनसंरक्षक राजगुरु यांच्या मार्गदर्शनाखाली आपण व इंदापूरचे वनपाल व्ही.एस.खारतोडे, वनरक्षक एस. व्ही.गीते, वनमजूर बाळू वाघमारे, एल.एन.कुंभार, राजेंद्र कांबळे, सुरेश पवार, निखिल जगताप हे या वनगुन्ह्याचा कसोशीने तपास करत आहोत असे राहुल काळे यांनी सांगितले.
इंदापूर तालुक्यातील वनपरिक्षेत्राचा भाग वन्य प्राण्यांसाठी अभयवन म्हणून घोषित करण्यात आला आहे. वन्यजीवांना स्वतःजवळ बाळगणे, त्याची शिकार करणे यास कायद्यान्वये शिक्षेची तरतूद आहे. जर कोणी असे कृत्य करत असेेेल तसेच कोणाला अशा प्रकारचे कृत्य निदर्शनास आले, तर लोकांनी तातडीने त्याची माहिती वनविभागाला कळवावी असे आवाहन वनपरिक्षेत्र अधिकारी राहुल काळे यांनी केले आहे.
