बारामती – आज सकाळी माळेगाव कारखान्याची निवडणूकीची मतमोजणी सुरू होतानाच सुरवात वादग्रस्त झाली. मतपेट्या ठेवलेल्या ठिकाणचे सीसीटिव्ही फुटेज पाहिल्यानंतर दुपारी उशीरा सुरू झालेल्या मतमोजणीनंतर काट्याची लढाई सुरू झाली, त्यामुळे तब्बल वीस वर्षानंतर आज पहिल्यांदाच मतमोजणीच्या अगदी संध्याकाळ पर्यंतही सगळीकडे सामसूम होती.. संध्याकाळी सहावाजेपर्यंत हाती आलेल्या निकालानुसार ब वर्ग प्रतिनिधी संघातून राष्ट्रवादी पुरस्कृत निळकंठेश्वर पॅनेलचे स्वप्नील शिवाजीराव जगताप यांनी विजय मिळवून राष्ट्रवादीला खाते उघडून दिले, तर पहिल्या गटात सत्ताधारी सहकार बचाव पॅनेलचे प्रमुख रंजनकुमार तावरे, राष्ट्रवादीच्या निळकंठेश्वर पॅनेलचे प्रमुख उमेदवार बाळासाहेब पाटील तावरे व संजय़ काटे हे थोड्याफार मतांनी आघाडीवर होते.
माळेगाव कारखान्याची लढाई सहकार चळवळीच्या दृष्टीने महत्वाची मानली जात होती. या निवडणूकीचे पडसाद राज्यभर उमटणार असल्याने या निवडणूकीकड़े सर्वांचेच बारकाईने लक्ष आहे. राज्यात सर्वाधिक ऊस दर दिल्याचा मुद्दा पुढे करीत सत्ताधारी रंजनकुमार तावरे व ज्येष्ठ नेेते चंद्रराव तावरे यांनी खासगीकरणाचा मुद्दा प्रभावी बनवला. दुसरीकडे उपमुख्यमंत्री अजित पवार यांनी हा कारखाना कोणत्याही स्थितीत ताब्यात घ्यायचाच हा इरादा ठेवून व्यूहरचना आखली. त्यामुळेच माळेगावच्या सत्ताधारी पॅनेलने ऊस भावाचा मुद्दा प्रतिष्ठेचा बनवूनही ही निवडणूक चुरशीची बनली. या निवडणूकीत निरा देवघरच्या पाण्याचा मुद्दा, विक्रमी उसदराचा मुद्दा, विस्तारीकरण, डिस्टीलरी, शरद पवार हे मुद्दे अत्यंत प्रभावी ठरले होते.
संध्याकाळी सहा वाजता हाती आलेल्या माहितीनुसार खूप कमी मतांचा फरक हा निळकंठेश्वर व सहकार बचाव पॅनेलमध्ये होता. मात्र क्रॉस व्होटिंग मोठ्या प्रमाणात झाल्याने मतमोजणीला विलंब लागत आहे.
