काका यादव, वालचंदनगर : इंदापूर तालुक्यातील वालचंदनगर पोलीस ठाण्याच्या हद्दीत दहशत माजविणाऱ्या व सार्वजनिक शांततेला धोका निर्माण करणाऱ्या अंबादास तायप्पा पवार (वय ३८, रा. चिखली, ता. इंदापूर, जि. पुणे) या सराईत गुन्हेगारावर ‘एमपीडीए’ कायद्यांतर्गत कारवाई करण्यात आली आहे. पुणे जिल्हाधिकाऱ्यांच्या आदेशानुसार त्यास ताब्यात घेऊन नागपूर मध्यवर्ती कारागृहात स्थानबद्ध करण्यात आले आहे.
पुणे ग्रामीणचे पोलीस अधीक्षक संदीप सिंह गिल्ल यांनी जिल्ह्यातील जामिनावर सुटलेले आणि पुन्हा गंभीर गुन्हे करणाऱ्या सराईत गुन्हेगारांचे रेकॉर्ड अद्ययावत करण्याचे निर्देश दिले होते. खून, खुनाचा प्रयत्न, जबरी चोरी, दरोडा, खंडणी आणि बेकायदेशीर अग्निशस्त्रे बाळगणाऱ्यांवर ‘एमपीडीए’ (MPDA) अन्वये कडक कारवाई करण्याच्या सूचना त्यांनी दिल्या होत्या.
या पार्श्वभूमीवर वालचंदनगर पोलीस ठाण्याचे पोलीस निरीक्षक गोपाळ पवार यांनी चिखली येथील सराईत गुन्हेगार अंबादास पवार याच्या गुन्हेगारी कृत्यांचा आढावा घेतला. पवार याच्यावर २०११, २०१४, २०१६, २०२४ आणि २०२६ या वर्षांत दरोड्याची पूर्वतयारी, बेकायदेशीर शस्त्रे बाळगणे, खंडणी उकळणे, खुनाचा प्रयत्न, जबरी चोरी, सरकारी कामात अडथळा आणून मारहाण करणे अशा गंभीर स्वरूपाचे १० गुन्हे दाखल आहेत.
त्याच्या वाढत्या गुन्हेगारीला आळा घालण्यासाठी वालचंदनगर पोलिसांनी तयार केलेला एमपीडीए स्थानबद्धतेचा प्रस्ताव पोलीस अधीक्षक संदीप सिंह गिल्ल यांच्यामार्फत पुणे जिल्हाधिकारी तथा जिल्हादंडाधिकारी जितेंद्र डुडी यांच्याकडे पाठविला होता. जिल्हाधिकाऱ्यांनी या प्रस्तावाची पडताळणी करून १३ ऑक्टोबर २०२६ रोजी अंबादास पवार याच्या स्थानबद्धतेचा आदेश जारी केला.
या आदेशानंतर वालचंदनगर पोलिसांनी विविध पथके तयार करून शोध घेत १५ ऑक्टोबर २०२६ रोजी अंबादास पवार याला ताब्यात घेतले आणि त्याची मध्यवर्ती कारागृह नागपूर येथे रवानगी केली.
ही कारवाई पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार (बारामती विभाग), उपविभागीय पोलीस अधिकारी चैतन्य कदम (बारामती उपविभाग) यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, वालचंदनगरचे पोलीस निरीक्षक गोपाळ पवार, सहायक पोलीस निरीक्षक राजकुमार डुणगे, पोलीस उपनिरीक्षक अविनाश घोरपडे, सहायक पोलीस उपनिरीक्षक महेश बनकर, रामदास बाबर, पोलीस हवालदार शैलेश स्वामी, कीर्तिलाल गायकवाड, गणेश झरेकर, गणेश काटकर, विकास निर्मळ, तसेच पोलीस अंमलदार अभिजित कळसकर, विक्रमसिंह जाधव, गणेश वानकर, अजित राऊत आणि राहुल माने यांच्या पथकाने केली.
