बारामती : ॲग्रिकल्चरल डेव्हलपमेंट ट्रस्ट संचलित डॉ. शरदचंद्र पवार कृषी व संलग्न महाविद्यालय, बारामती येथे ‘पंडित दीनदयाळ उपाध्याय रोजगार महाकुंभ २०२६’ अंतर्गत भव्य रोजगार मेळावा उत्साहात संपन्न झाला. या मेळाव्यात सहभागी झालेल्या ९० विद्यार्थ्यांमधून ५४ विद्यार्थ्यांची नामांकित कंपन्यांमध्ये तात्काळ निवड झाली आहे.
महाराष्ट्र शासनाचा कौशल्य, रोजगार, उद्योजकता व नाविन्यता विभाग तसेच उच्च व तंत्रशिक्षण विभागाच्या सहकार्याने महाविद्यालयाच्या रोजगार कक्षातर्फे हा उपक्रम राबवण्यात आला. “तुमची गुणवत्ता, आमचा पाठिंबा, उज्ज्वल भविष्य” या संकल्पनेवर आधारित या मेळाव्यात बी.एस्सी. कृषी, एम.एस्सी. कृषी, कृषी व्यवसाय व्यवस्थापन आणि कृषी पदविका अभ्यासक्रमाच्या विद्यार्थ्यांनी सहभाग घेतला. या मेळाव्यात कृषी क्षेत्रातील सात नामांकित कंपन्यांनी सहभाग घेतला. यामध्ये ५ कंपन्यांनी प्रत्यक्ष, तर २ कंपन्यांनी ऑनलाइन मुलाखती घेतल्या.
कंपनीनिहाय निवड झालेले विद्यार्थी : ॲग्रीस्टॅट ॲग्रिटेक सर्व्हिसेस : २० विद्यार्थी. पॉलेन ॲग्रो मिनरल्स प्रा. लि. : १२ विद्यार्थी. डीसीएम श्रीराम प्रा. लि. : ८ विद्यार्थी. टर्निंग पॉइंट नॅचरल केअर : ७ विद्यार्थी. स्प्राऊट इंडिया प्रा. लि. : ७ विद्यार्थी
मुलाखतींपूर्वी कंपनी प्रतिनिधींनी विद्यार्थ्यांना कृषी क्षेत्रातील नव्या संधी व आवश्यक कौशल्यांविषयी मार्गदर्शन केले. तसेच आधुनिक पीक संरक्षणासाठी उपयुक्त ठरणाऱ्या ‘चिपकू कृत्रिम बुद्धिमत्ता आधारित स्मार्ट सापळा’ या तंत्रज्ञानाचे सादरीकरणही करण्यात आले.
हा उपक्रम संस्थेचे प्रमुख राजेंद्र पवार आणि विश्वस्त सुनंदा पवार यांच्या मार्गदर्शनाखाली पार पडला. संस्थेचे समन्वयक प्रा. ए. बी. रासकर, कृषी व्यवसाय व्यवस्थापन महाविद्यालयाच्या प्राचार्या आरती भोईटे, कृषी महाविद्यालयाचे प्राचार्य डॉ. अतुल गोंडे, उपप्राचार्य प्रा. एस. पी. गायकवाड आणि एचआर अभिषेक जाधव यांनी नियोजन केले. या मेळाव्यामुळे विद्यार्थ्यांना प्रत्यक्ष मुलाखतीचा अनुभव मिळण्यासोबतच कृषी क्षेत्रात रोजगाराची भक्कम संधी उपलब्ध झाली.
