बारामती : येथील शारदाबाई पवार विद्यानिकेतन व डे स्कूलच्या वतीने आयोजित करण्यात आलेल्या पुणे जिल्हास्तरीय मल्लखांब स्पर्धेत यजमान शारदानगरच्या खेळाडूंनी निर्विवाद वर्चस्व गाजवले. स्पर्धेत उत्कृष्ट कामगिरीच्या जोरावर विद्यालयातील ६ विद्यार्थी आणि २ विद्यार्थिनी अशा एकूण ८ मल्लखांबपटूंची विभागीय स्तरावरील स्पर्धेसाठी निवड झाली आहे.
या जिल्हास्तरीय स्पर्धेत पुणे जिल्ह्यातील विविध शाळांमधून सुमारे १५० खेळाडूंनी सहभाग नोंदवला होता. शारदाबाई पवार विद्यानिकेतन व डे स्कूल तसेच शारदाबाई पवार इंग्लिश मीडियम सीबीएसई स्कूलच्या विद्यार्थ्यांनी शारीरिक चपळता, तोल, एकाग्रता आणि शिस्तीचे उत्कृष्ट प्रदर्शन करत विविध गटांमध्ये घवघवीत यश मिळवले. विद्यार्थ्यांची मल्लखांबावरील अवघड प्रात्यक्षिके आणि कसरती पाहून उपस्थित क्रीडारसिकांनी दाद दिली.
यशस्वी विद्यार्थी पुढीलप्रमाणे : १४ वर्षे मुले गट: वेदांत श्रीकांत गाढवे (प्रथम), शंभू मुकेश बदे (द्वितीय). १७ वर्षे मुली गट: तेजस्विनी नागटिळक (प्रथम). १७ वर्षे मुले गट: शिवजीत संतोष वळकुंदे (प्रथम), सुरज नामदेव शिंदे (द्वितीय). १९ वर्षे मुले गट: ओम शिवाजी कोऱ्हाळे (प्रथम), अर्जुन उमेश जांबले (द्वितीय). १९ वर्षे मुली गट: सान्वी लीलाधर सरडे (प्रथम). स्पर्धेत १७ वर्षे मुले गटात प्रथम क्रमांक पटकावणाऱ्या शिवजीत संतोष वळकुंदे या विद्यार्थ्याने केलेल्या अनोख्या व कौशल्याधिष्ठित खेळाचे उपस्थितांकडून विशेष कौतुक करण्यात आले.
या उल्लेखनीय यशाबद्दल संस्थेचे प्रमुख राजेंद्र पवार, विश्वस्त सौ. सुनंदा पवार, संस्थेचे पदाधिकारी आर. बी. देशमुख, आशिष रासकर, मानव संसाधन प्रमुख अभिषेक जाधवराव, क्रीडा समन्वयक सचिन शेलार, मुख्याध्यापक सूर्यकांत मुंढे, श्री. वाघ, सिंग, क्रीडा प्रशिक्षक सौ. पूनम जाधव, सोमनाथ कोठावळे तसेच संघ व्यवस्थापक श्री थोरात यांनी सर्व यशस्वी खेळाडूंचे अभिनंदन करून त्यांना पुढील विभागीय स्पर्धेसाठी शुभेच्छा दिल्या.
