शिक्रापूर पोलिसांची धडक कारवाई; ४.५० लाखांचे दागिने जप्त! सीसीटीव्ही फुटेजच्या मदतीने आरोपीच्या मुसक्या आवळल्या
शिक्रापूर : गोड बोलून विश्वास संपादन करायचा, सोन्याच्या बिस्किटाचे आमिष दाखवून अंगावरील दागिने लंपास करायचे आणि पोबारा करायचा… अशाच एका चलाख भामट्याचा शिक्रापूर पोलिसांनी बीडमध्ये जाऊन पर्दाफाश केला आहे. महिलेला पितळेचे बिस्कीट देऊन तिचे साडेचार लाख रुपये किमतीचे ३ तोळे सोन्याचे दागिने लुटणाऱ्या आरोपीला पोलिसांनी बेड्या ठोकल्या असून, त्याच्याकडून चोरीचा सर्व मुद्देमाल हस्तगत करण्यात आला आहे. अभिमान बाबू तुपे (वय ४९, रा. पिठ्ठी निरगुडी, ता. पाटोदा, जि. बीड) असे अटक करण्यात आलेल्या आरोपीचे नाव आहे.
करंदी येथील नंदा गणपत दरेकर (वय ५२) या २८ सप्टेंबर रोजी नातेवाईकांच्या कार्यक्रमासाठी खंडाळे येथे जाण्यास निघाल्या होत्या. शिक्रापूर येथील चाकण चौकात वाहनाची वाट पाहत असताना अनोळखी आरोपीने त्यांच्याशी संवाद साधला. गोड बोलून त्याने दरेकर यांचा विश्वास जिंकला आणि त्यांना चाकण चौकातून तळेगाव ढमढेरे रस्त्यावरील सुपर बाजाराजवळील एका झाडाखाली नेले.
तेथे बोलण्यात गुंतवून त्याने दरेकर यांच्या हातातील दोन सोन्याच्या बांगड्या कटरच्या सहाय्याने कापल्या, तसेच गळ्यातील सोन्याची पानपोतही काढून घेतली. त्यानंतर ‘हे तुमच्या सोन्यापेक्षा जास्त वजनाचे आहे’ असे सांगत त्यांच्या हातात हुबेहूब सोन्यासारखे दिसणारे पितळेचे बिस्कीट टेकवले आणि तो पसार झाला. संशय आल्याने दरेकर यांनी ते बिस्कीट तपासले असता आपली फसवणूक झाल्याचे उघड झाले. याप्रकरणी त्यांनी शिक्रापूर पोलीस ठाण्यात तक्रार दाखल केली. पोलिसांनी भारतीय न्याय संहिता (BNS) कलम ३१८(४) आणि ३०३(२) अन्वये गुन्हा नोंदवून तपास सुरू केला.
घटनेचे गांभीर्य ओळखून पोलिसांनी चाकण चौक परिसरातील सीसीटीव्ही कॅमेऱ्यांचे फुटेज बारकाईने तपासले. तांत्रिक विश्लेषणाच्या आधारे आरोपी बीड जिल्ह्यातील असल्याची माहिती समोर आली. पोलिसांच्या पथकाने तातडीने बीड गाठून अभिमान तुपे याला शिताफीने ताब्यात घेतले. चौकशीअंती त्याच्याकडून दोन सोन्याच्या बांगड्या आणि एक पानपोत असा एकूण ३ तोळे वजनाचा (किंमत सुमारे ४.५० लाख रुपये) सर्व मुद्देमाल जप्त करण्यात आला.
या गुन्ह्यात आणखी एका साथीदाराचा समावेश असल्याचे निष्पन्न झाले असून पोलीस त्याचा कसून शोध घेत आहेत. वृद्ध महिलेला फसवून आरोपीने पोलिसांना चकवा देण्यासाठी थेट बीड गाठले होते. मात्र, चाकण चौक आणि परिसरातील सीसीटीव्ही कॅमेऱ्यांनी त्याचा चेहरा टिपला. पोलिसांनी सीसीटीव्ही फुटेज आणि तांत्रिक तपासाची अचूक सांगड घालत थेट आरोपीच्या गावात छापा टाकून त्याला जेरबंद केले.
सदर कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक शुभम कुमार, उपविभागीय पोलीस अधिकारी रवींद्र भोसले यांच्या मार्गदर्शनाखाली पोलीस निरीक्षक चंद्रशेखर यादव, सहायक पोलीस फौजदार लहानू बांगर, पोलीस हवालदार बापू हाडगळे, विश्वंभर वाघमारे आणि शिवाजी चितारे यांच्या पथकाने केली.
