अरेच्च्या! एकाच दिवशी एकाच पोलिस ठाण्यात लाचखोरीच्या दोन घटना! ११ हजारांची लाच घेताना पोलिस हवालदार अटकेत; तर कारवाईची चाहूल लागताच ९५ हजार लाचेची रक्कम घेऊन पोलिस हवालदार पळाला..!
शिरूर : महान्यूज लाईव्ह
शिरूर पोलीस स्टेशन हद्दीत लाचलुचपत प्रतिबंधक विभागाने केलेल्या कारवाईत पोलीस स्टेशन बाहेर अकरा हजार रुपयांची लाच स्वीकारताना एका पोलीस हवालदाराला रंगेहाथ पकडले आहे तर दुसऱ्या कारवाईत ९५ हजार रुपयांची लाच घेऊन पोलीस कारवाईची चाहूल लागताच एका आरोपीने पोलीस चौकीच्या बाहेरून पळ काढला. एकाच दिवशी एकाच पोलीस ठाणे अंतर्गत झालेल्या दोन कारवाईमुळे शिरूर तालुक्यात खळबळ उडाली आहे.
पोलीस हवालदार शिवाजी बनकर यावर ११ हजार रुपयांची लाच स्वीकारले प्रकरणी लाचलुचपत प्रतिबंधक विभागाने गुन्हा दाखल केला आहे. तर पोलीस हवालदार सतीश मुंडे हा ९५ हजार रुपये लाचेची रक्कम घेऊन पसार झाल्याने त्यावर देखील लाचलुचपत प्रतिबंधक विभागाने गुन्हा दाखल केला आहे.
याबाबत मिळालेल्या माहितीनुसार, पहिल्या घटनेत तक्रारदार व त्यांच्या आई-वडिलांना अटक न करता नोटीस देऊन सोडण्यासाठी व गुन्ह्यात मदत करण्यासाठी पोलीस हवालदार शिवाजी बनकर याने ९५ हजार रुपयांची लाचेची मागणी केली होती. लाचलुचपत प्रतिबंधक विभागाकडे तक्रार दाखल केल्यानंतर पडताळणी केली असता ४ हजार रुपये दिल्याचे मान्य झाले. त्यानंतर लाचलुचपत प्रतिबंधक विभागाने शिरूर पोलीस स्टेशन बाहेर सापळा रचून शिवाजी बनकर याला ११ हजार रुपये लाच स्वीकारताना रंगेहाथ पकडले आहे.
दरम्यान दुसऱ्या घटनेत तक्रारदार व त्यांच्या कुटुंबीयांना अटक न करण्यासाठी व गुन्ह्यात मदत करण्यासाठी पोलीस हवालदार सतीश मुंढे याने सुरुवातीला एक लाख रुपयांची मागणी करण्यात आली. तडजोडीअंती ९५ हजार रुपये देण्याचे ठरले होते. याबाबत तक्रारदाराने लाचलुचपत प्रतिबंधक विभागाकडे तक्रार दाखल केली होती. लाचलुचपत प्रतिबंधक विभागाच्या कारवाईची खबर लागताच पोलिस हवालदार सतीश मुंढे याने लाचेची स्वीकारलेली रक्कम घेऊन टाकळी हाजी पोलीस चौकीतून पळ काढला. या प्रकरणी शिरूर पोलीस स्टेशन येथे आरोपी मुंढे याच्याविरुद्ध लाचलुचपत प्रतिबंधक विभागाने तक्रार दाखल केली आहे.
दरम्यान शिरूर पोलीस स्टेशन हद्दीत एकाच दिवशी झालेल्या दोन कारवाईमुळे खळबळ उडाली आहे. दुसऱ्या घटनेत आरोपीने लाचेची रक्कम घेऊन पळ काढला, मात्र लाचलुचपत विभागाच्या कारवाईची खबर लागलीच कशी? असा सवाल उपस्थित झाला आहे. या पूर्वी देखील शिरूर तालुक्यात पोलिस व महसूल खात्यात लाचलुचपत विभागाच्या मोठ्या कारवाया झाल्या असून दोन्ही खाते बदनाम झाले आहे. शिरूर पोलिस स्टेशन अंतर्गत झालेल्या या कारवाईने पुन्हा तालुक्यात चर्चांना उधाण आले आहे.
