राजेंद्र झेंडे, महान्युज लाईव्ह
दौंड : महाराष्ट्र शासनाच्या मदत व पुनर्वसन विभागाच्या शासन निर्णयानुसार आणि जिल्हाधिकारी, पुणे यांच्या निर्देशानुसार दौंड तालुक्यात सन २०२६ च्या खरीप हंगामासाठी ‘Trigger 1’ (प्रथम कळ) लागू करण्यात आला आहे.
या पार्श्वभूमीवर तालुक्यामध्ये खरीप पिके व फळपिकांचे शेतकरीनिहाय नुकसान पंचनामे करण्याच्या कामास तात्काळ सुरुवात करण्याचे आदेश तहसीलदार, तालुका कृषी अधिकारी व गटविकास अधिकारी, दौंड यांच्या द्वारे संयुक्तपणे देण्यात आले आहेत.
प्रशासनाकडून मिळालेल्या माहितीनुसार, क्षेत्रीय स्तरावर उपयोगात असलेल्या सुधारित प्रपत्रांमध्ये गावनिहाय पंचनाम्याची कार्यवाही केली जात आहे. पंचनामा करताना शेतकऱ्यांचा AgiStack Farmer ID असणे आवश्यक करण्यात आले आहे, त्यामुळे शेतकऱ्यांनी आपला फार्मर आयडी तयार ठेवावा.
या कामासाठी महसूल मंडळनिहाय गावपातळीवर विशेष पथकांची निर्मिती करण्यात आली आहे. प्रत्येक पथकामध्ये ग्राम महसूल अधिकारी (तलाठी), ग्रामपंचायत अधिकारी / ग्रामविकास अधिकारी
आणि सहाय्यक कृषी अधिकारी यांचा समावेश असून त्यांना नेमून दिलेली गावे व जबाबदाऱ्या पार पाडण्याचे निर्देश देण्यात आले आहेत. तर मंडळ अधिकारी, उप कृषी अधिकारी व विस्तार अधिकारी (कृषी) हे या संपूर्ण कामाचे पर्यवेक्षणीय कामकाज पाहणार आहेत.
ही नैसर्गिक आपत्तीची गणना असून, शासनाच्या निर्देशानुसार सर्व पथकांनी विहित प्रपत्रात तात्काळ पंचनामे पूर्ण करून अहवाल सादर करणेबाबत सूचना देण्यात आल्या आहेत. त्यामुळे दौंड तालुक्यातील ज्या शेतकऱ्यांचे खरीप आणि फळपिकांचे नुकसान झाले आहे, त्यांनी आपल्या संबंधित तलाठी आणि कृषी सहाय्यकांशी संपर्क साधण्याचे आवाहन प्रशासनाकडून करण्यात आले आहे.
