दौंड : महान्युज लाईव्ह
दौंड पोलीसांनी तालुक्यात अवैध धंद्यांविरोधात धडक मोहीम राबवत एकाच दिवशी दोन वेगवेगळ्या ठिकाणी कारवई केली आहे. यात अवैध दारू विक्री करणाऱ्या एका इसमाला आणि जुगार खेळणाऱ्या सहा जणांना ताब्यात घेऊन त्यांच्यावर गुन्हे दाखल करण्यात आले आहेत.
दौंड पोलीस ठाण्याच्या हद्दीतील मसनेरवाडी, येडे वस्ती, लिंगाळी गावच्या हद्दीत दौंड शुगरकडे जाणाऱ्या रोडलगत असणाऱ्या किराणा दुकानाच्या आडोशाला एक इसम बेकायदेशीरपणे दारू विक्री करत असल्याची माहिती पोलिसांना मिळाली होती. त्यानुसार पोलिसांनी छापा टाकला असता भगवान महादेव येडे (वय ५० वर्षे, रा. मसनेरवाडी, येडे वस्ती, लिंगाळी, ता. दौंड) हा इसम स्वतःच्या आर्थिक फायद्यासाठी १७४० रुपये किमतीची देशी व विदेशी दारू चोरून विक्री करताना मिळून आला.
तसेच दौंड शहरातील म्हसोबा चाळ, शालिमार चौक येथे करण्यात आली. एका बंद घराच्या पाठीमागे मोकळ्या जागेत काही इसम बेकायदेशीरपणे जुगार खेळत असल्याची माहिती मिळाली होती. पोलिसांनी तेथे छापा टाकला असता ६ जण ४५७० रुपये किमतीचे जुगाराचे साहित्य व रोख रक्कम जवळ बाळगून ५२ पत्त्यांच्या कॅटचा रमी नावाचा जुगार पैशावर खेळत व खेळवत असताना मिळून आले.
याप्रकरणी पोलिसांनी सहदेव नागनाथ जाधव,( वय ३८, रा. जय मल्हार बिल्डिंग, लोणी काळभोर, ता. हवेली), थॉमस जेम्स उघडे, (वय ५४, रा. म्हसोबा चाळ, शालिमार चौक, दौंड) अजय रमण शिंदे, (वय ३६, रा. फॉरेस्ट क्वार्टर जवळ, शालिमार चौक, दौंड) अंबादास रामचंद्र सलगर,( वय ५४, रा. बर्फ कारखाना जवळ, लिंगाळी रोड, दौंड) किरण शांताराम शिंदे,( वय ५७, रा. दत्त मंदिर जवळ, शालिमार चौक, दौंड) राजू राजाराम पलंगे, वय ४५, रा. खाटीक गल्ली, दौंड) यांच्यावर पोलिसांनी गुन्हा दाखल केला आहे.
या प्रकरणी पोलीस शिपाई पवन शंकर माने आणि गोरख बाबासाहेब हजारे यांनी फिर्याद दिली. त्यावरून दौंड पोलीस ठाण्यात महाराष्ट्र दारूबंदी अधिनियम १९४९ चे कलम ६५ (ई) प्रमाणे तसेच महाराष्ट्र जुगार कायदा कलम १२ (अ) प्रमाणे गुन्हा दाखल करण्यात आला असून अधिक तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार वैभव माने हे करत आहेत.
