बारामती : माळेगाव परिसरातील शिवनगर येथे घरासमोरील सिमेंटच्या विटांचे कम्पाउंड परवानगीशिवाय ट्रॅक्टरच्या साहाय्याने पाडल्याचा तसेच विरोध करण्यासाठी गेलेल्या व्यक्तीच्या अंगावर ट्रॅक्टर घालण्याचा प्रयत्न केल्याचा प्रकार समोर आला आहे. याप्रकरणी माळेगाव पोलिसांनी पाच जणांविरुद्ध गुन्हा दाखल करून त्यांना अटक केली आहे.
पोलिसांनी दिलेल्या माहितीनुसार, ही घटना १८ सप्टेंबर रोजी सकाळी साडेअकराच्या सुमारास शिवनगर येथे घडली. फिर्यादी अविनाश बाळकृष्ण नरूटे यांच्या घरासमोरील कम्पाउंडकडे रणजीत लालासाहेब ढोले हा क्रमांक नसलेला ट्रॅक्टर घेऊन आला. ट्रॅक्टरच्या समोरील लोखंडी फरांडीने कम्पाउंडला वारंवार धडक देऊन ते पाडल्याने नुकसान झाल्याचे फिर्यादीत नमूद करण्यात आले आहे.
कम्पाउंड पाडण्यास विरोध करण्यासाठी अविनाश नरूटे व त्यांचा भाऊ नंदकिशोर हे ट्रॅक्टर थांबविण्यासाठी गेले असता, रणजीत ढोले याने ट्रॅक्टर त्यांच्या अंगावर घालण्याचा प्रयत्न केल्याचा आरोप आहे. यामुळे गंभीर दुखापत होण्याची तसेच जीवितास धोका निर्माण होण्याची शक्यता असल्याचे फिर्यादीत म्हटले आहे. त्यानंतर सुजित लालासाहेब ढोले, तेजम सुनिल ढोले, सुनिल शंकर ढोले आणि बाळासाहेब शंकर ढोले यांनी जमाव करून दगड व हाताने मारहाण केली तसेच शिवीगाळ व दमदाटी केल्याचा आरोप करण्यात आला आहे.
या प्रकरणी अविनाश नरूटे यांच्या फिर्यादीवरून माळेगाव पोलीस ठाण्यात भारतीय न्याय संहितेतील कलम ११०, ११८(१), १८९(२), १९१(२), १९०, ११५(२), ३५१(२) आणि ३५२ अन्वये गुन्हा दाखल करण्यात आला आहे. रणजीत लालासाहेब ढोले, सुजित लालासाहेब ढोले, तेजम सुनिल ढोले, सुनिल शंकर ढोले आणि बाळासो शंकर ढोले या पाचही आरोपींना पोलिसांनी अटक केली आहे. या प्रकरणाचा पुढील तपास पोलीस उपनिरीक्षक साळवे करीत असून गुन्हा दाखल करण्याची कार्यवाही पोलीस हवालदार लोंढे यांनी केली.
