रक्षाबंधनाच्या पूर्वसंध्येला डॉ. निखिल गव्हाणे यांची माणुसकी आणि कर्तव्यनिष्ठेची हृदयस्पर्शी अनुभूती
गेवराई : डॉक्टरकी हा केवळ व्यवसाय नसून संकटाच्या क्षणी एखाद्याचा जीव वाचविण्याची जबाबदारी आहे, याचा प्रत्यय गेवराई येथे घडलेल्या एका प्रसंगातून आला. रक्षाबंधनाच्या पूर्वसंध्येला गंभीर अवस्थेतील एका गरोदर महिलेची रस्त्यातच प्रसूती करून आईचा जीव वाचविण्यासोबतच श्वासोच्छ्वास व हृदयाचे ठोके नसलेल्या नवजात बाळाला तातडीने उपचार देत त्याला जीवदान देण्यात बालरोगतज्ज्ञ डॉ. निखिल अनंत गव्हाणे यांनी महत्त्वपूर्ण भूमिका बजावली.
डॉ. गव्हाणे हे नेहमीप्रमाणे आपली बॅग घेऊन गेवराई येथील शारदा हॉस्पिटलच्या पार्किंगमध्ये पोहोचले होते. त्याचवेळी त्यांची नजर एका वाहनाकडे गेली. त्या वाहनातून गंभीर अवस्थेतील गरोदर महिलेला रुग्णालयात आणण्यात आले होते. परिस्थितीचे गांभीर्य लक्षात येताच डॉ. गव्हाणे यांनी तातडीने स्त्रीरोगतज्ज्ञांशी संपर्क साधला. मात्र, त्या क्षणी संबंधित तज्ज्ञ रुग्णालयात उपलब्ध नव्हते.
वेळ अत्यंत कमी आणि परिस्थिती अत्यंत गंभीर होती. महिलेची प्रकृती झपाट्याने खालावत असल्याचे लक्षात येताच डॉ. गव्हाणे यांनी क्षणाचाही विलंब न करता आपल्या हातातील वैद्यकीय बॅग खाली ठेवली आणि वाहनाच्या दिशेने धाव घेतली. परिस्थितीचे गांभीर्य ओळखून त्यांनी वाहनातच प्रसूती करण्याचा धाडसी निर्णय घेतला.
रुग्णालयातील ब्रदर आणि सिस्टर यांनीही तत्परतेने आवश्यक वैद्यकीय साहित्य उपलब्ध करून दिले. डॉक्टर आणि रुग्णालयातील कर्मचाऱ्यांच्या समन्वयातून अत्यंत आव्हानात्मक परिस्थितीत वाहनातच प्रसूती करण्यात आली. त्यानंतर आईचा जीव धोक्याबाहेर आला; मात्र संकट अद्याप टळले नव्हते.
नवजात बाळ जन्मल्यानंतर रडत नव्हते. त्याचा श्वास सुरू नव्हता आणि हृदयाचे ठोकेही जाणवत नव्हते.
क्षणभरही न थांबता डॉ. गव्हाणे यांनी बाळाला तातडीने ताब्यात घेतले आणि उपचारांसाठी ICUच्या दिशेने धाव घेतली. आईला पुढील उपचारांसाठी हलविण्याची जबाबदारी त्यांनी रुग्णालयातील कर्मचाऱ्यांवर सोपविली. ICUमध्ये बाळावर तातडीने उपचार सुरू करण्यात आले.
बाळाला इंट्युबेशनची गरज भासली. डॉक्टरांनी आवश्यक वैद्यकीय उपचार सुरू ठेवत अखेर बाळाचा श्वास पुन्हा सुरू करण्यात यश मिळविले.
काही वेळाने बाळाच्या हृदयाचे ठोके वाढले आणि अखेर त्या नवजात बाळाने रडण्याचा आवाज केला. त्या क्षणी उपचार करणाऱ्या डॉक्टरांसह रुग्णालयातील कर्मचाऱ्यांनाही मोठा दिलासा मिळाला. सध्या आई आणि बाळ दोघेही सुरक्षित असून त्यांची प्रकृती स्थिर असल्याचे सांगण्यात आले आहे.
‘याजसाठी केला होता अट्टहास…’
रक्षाबंधन म्हणजे भाऊ-बहिणीच्या नात्यातील प्रेम, विश्वास आणि संरक्षणाचा धागा. अशाच या पवित्र सणाच्या पूर्वसंध्येला एका आईचा आणि तिच्या बाळाचा जीव वाचविण्यासाठी डॉ. निखिल गव्हाणे यांनी केलेली धडपड माणुसकीचा सुंदर संदेश देऊन जाते.
एखाद्या संकटग्रस्त रुग्णाला वेळेवर वैद्यकीय मदत मिळणे किती महत्त्वाचे असते, याची जाणीव या प्रसंगातून पुन्हा अधोरेखित झाली. ‘रुग्ण प्रथम’ या भावनेतून क्षणाचाही विलंब न करता घेतलेला निर्णय आणि त्यानंतरची धावपळ यामुळे दोन जीव सुरक्षित झाले.
रक्षाबंधनाच्या पूर्वसंध्येला एका बहिणीला आणि तिच्या बाळाला मिळालेली ही भेट कोणत्याही मौल्यवान वस्तूपेक्षा मोठी आहे. कारण या भेटीत जीवन आहे, माणुसकी आहे आणि डॉक्टरकीच्या पेशातील कर्तव्यनिष्ठेची खरी ओळख आहे. डॉ. निखिल अनंत गव्हाणे यांच्या या तत्परतेचे, धाडसाचे आणि कर्तव्याप्रती असलेल्या निष्ठेचे सर्व स्तरांतून कौतुक होत आहे. संकटाच्या क्षणी ‘डॉक्टर’ म्हणून नव्हे, तर एका जीवासाठी धावणारा माणूस म्हणून त्यांनी दाखविलेली संवेदनशीलता निश्चितच प्रेरणादायी ठरली आहे.
