कर्जत : महान्यूज लाईव्ह
कर्जत-जामखेडचे आमदार रोहित पवार हे आजोबा शरद पवार यांच्या खांद्यावर बसून पंतप्रधान नरेंद्र मोदी, माजी मुख्यमंत्री देवेंद्र फडणवीस यांना सल्ले देतात.. रोहित पवारांनी आजोबांच्या खांद्यावरुन उतरावं तर त्यांना आपली उंची समजेल अशा शब्दात विधान परिषदेचे भाजप आमदार गोपीचंद पडळकर यांनी रोहित पवार यांच्यावर टिका केली आहे.
याचा व्हिडीओ येथे पहा अथवा महान्यूज फेसबुक पेज वर पाहू शकता
गोपीचंद पडळकर यांनी आपल्या ट्विटरवर कर्जत-जामखेड मतदारसंघातील मिरजगाव येथून एक व्हिडीओ पोस्ट केला आहे. यामध्ये त्यांनी रस्त्यांची अवस्था दाखवतानाच रोहित पवारांनी आजोंबांच्या खांद्यावरुन उतरुन आपली उंची मोजावी असा सल्ला दिला आहे.
गोपीचंद पडळकर म्हणतात, आजकाल रोहित पवार हे पंतप्रधान, विरोधी पक्षनेते अशा लोकांना सल्ले देत आहेत. त्यातून ते मिडीयातही दिसत आहेत. परंतु आजोबा शरद पवार यांच्या खांद्यावर बसून त्यांच्याकडून हे सल्ले दिले जात आहेत. वास्तविक त्यांच्या मतदारसंघातून वावरताना रस्त्यांची अवस्था काय झालीय याकडे लक्ष देण्याऐवजी आजोबांच्या खांद्यावर बसून सल्ले देण्याचे काम सुरु आहे.
‘रोहित पवार तुम्ही शरद पवार यांच्या खांद्यावरून खाली उतरा, म्हणजे तुम्ही किती खुजे आहात, हे तुम्हाला कळेल. मिरजगाव मधील गावातील साधा रस्ता तुम्हाला करता येत नसेल, आणि देशाच्या नेतृत्वांना तुम्ही सल्ले देत असाल, तर हे सल्ले देण्यापेक्षा कर्जत मतदारसंघातील हे रस्ते दुरुस्त करा. राज्यामध्ये तुमचे सरकार आहे. येत्या काही दिवसात कर्जत-जामखेड मतदारसंघातील रस्ते तुम्ही लवकरात-लवकर दुरुस्त करावे, व मग बाकीच्यांना सल्ले द्यावेत, एवढीच विनंती करतो,’ अशा शब्दात पडळकर यांनी रोहित पवारांना टोला लगावला आहे.
