विक्रम वरे : महान्यूज लाईव्ह
बारामती : बारामती नगरपरिषद निवडणुकीसंदर्भात सुरू असलेल्या राजकीय घडामोडींना मोठा कलाटणी देणारा निर्णय नुकताच समोर आला आहे. बारामती नगरपालिकेच्या निवडणुकीसाठी २ डिसेंबर रोजी मतदान होणार होते आणि त्यासाठी सर्व पक्षांनी जोरदार तयारी सुरू केली होती.शहरात प्रचाराला चांगलीच रंगत आली होती. उमेदवारांच्या प्रचार फेऱ्या,कार्यकर्त्यांची गर्दी,निवडणूक प्रचारासाठी घेतल्या जाणाऱ्या सभा यामुळे बारामती राजकीय तापमानाने उसळलेली होती.
मात्र, न्यायालयाच्या हस्तक्षेपामुळे ही निवडणूक अखेर पुढे ढकलण्यात आली आहे. काही तांत्रिक आणि कायदेशीर मुद्द्यांवर झालेल्या सुनावणीनंतर न्यायालयाने सध्याच्या वेळापत्रकावर स्थगिती लागू केली. त्यामुळे निवडणुकीची प्रक्रिया काही काळासाठी थांबवावी लागणार आहे. नवीन तारखा जाहीर झाल्या आहेत.
या निर्णयाचा सर्वाधिक परिणाम प्रचार मोहिमेवर झाला आहे. उपमुख्यमंत्री अजित पवार यांच्या महत्त्वपूर्ण सभेची तयारी जोरात सुरू होती.ही सभा शारदा प्रांगण येथे घेण्यात येणार होती आणि बारामतीतील कार्यकर्त्यांमध्ये तसेच नागरिकांमध्ये तिच्याबद्दल उत्सुकता होती. मात्र,निवडणूक पुढे ढकलल्यामुळे ती सभा अखेर रद्द करण्यात आली आहे.
पुढील काही दिवसांत निवडणुकीच्या नवीन प्रक्रिया जाहीर केली असून, त्यानंतर पुन्हा प्रचारयुद्ध रंगण्याची शक्यता राजकीय वर्तुळात व्यक्त केली जात आहे.
