बारामती : महान्यूज लाईव्ह
एम्स सारख्या प्रख्यात व प्रतिष्ठित दवाखान्यातून थेट बारामतीमध्ये स्त्री रूग्णांना रुग्णसेवा देताना डॉक्टर आशिष जळक यांनी आपली माणदेशाची पार्श्वभूमी सोडली नाही.. माणदेशाचा माणूस हा मनानं खूप संवेदनशील आणि मदतीला तत्पर असतो.. बारामती मध्ये गेल्या काही दिवसांपासून कोरोनाचे रुग्ण वाढत आहेत, या रुग्णांना ने-आण करण्यासाठी रुग्णवाहिकेची उपलब्धता नसेल तेव्हा शासकीय यंत्रणेची तारांबळ उडते…ही शासकीय यंत्रणेची तारांबळ दररोज पाहणाऱ्या डॉक्टर आशिष जळक यांनी आज त्यांच्या पत्नी डॉ. प्रियांका यांचा वाढदिवस साजरा करताना आपल्या दवाखान्याची रुग्णवाहिका थेट सरकारी आरोग्य यंत्रणेला भेट दिली. या आगळ्यावेगळ्या भेटीने डॉक्टर प्रियांका यांचा वाढदिवस जळक कुटुंबीयांसाठी देखील संस्मरणीय ठरला.
दिवस : आजचा, वेळ : दुपारी अडीचची… बारामतीतील सिल्वर जुबिली हॉस्पिटलमध्ये एक रुग्णवाहिका आत मध्ये वळाली आणि ती तशीच येऊन रुग्णालयाच्या समोर थांबली. या रुग्णवाहिकेतून चालकाने येऊन ती चावी डॉक्टर जळक यांच्याकडे सुपूर्द केली आणि डॉक्टरांनी ती चावी रुग्णालयाचे वैद्यकीय अधीक्षक डॉक्टर सदानंद काळे यांच्याकडे..!!
खऱ्या अर्थाने कोरोना युद्धे ठरलेल्या डॉक्टर दाम्पत्याने आज अचानक कोणताही गाजावाजा न करता ही रुग्णवाहिका सिल्व्हर ज्युबिली शासकीय उपजिल्हा रुग्णालयात आणली आणि त्याच्या चाव्या रुग्णालयाचे वैद्यकीय अधीक्षक डॉक्टर सदानंद काळे यांच्याकडे सुपूर्द केल्या. या भेटीने डॉक्टर काळे देखील भारावून गेले.
आज गरज असताना आज अनपेक्षितरित्या मिळत असलेली ही भेट आमच्यासाठी अत्यंत महत्त्वाची आहे. आम्ही जर कुटुंबाचे या मदतीबद्दल आभार मानतो – डॉ. सदानंद काळे, वैद्यकीय अधीक्षक सिल्वर जुबिली शासकीय उपजिल्हा रुग्णालय.
डॉक्टर आशिष जळक यांनी आपल्या पत्नीला वाढदिवसाची भेट देताना समाजावरील संकटांमध्ये हातभार लावण्याचा केलेला एक अतुलनीय प्रयत्न आहे. – डॉ. सुजित अडसूळ, आय एम ए चे सदस्य व बारामतीतील भूलतज्ञ.
मी नेहमीच एक वेगळा विचार करत आलो या भागाने या परिसराने आपल्याला खूप महत्त्व दिले मोठेपण दिले येथील रुग्ण सेवा करण्याची संधी दिली आणि जेव्हा जेव्हा या भागाची ऋण भेटण्याची वेळ येईल तेव्हा तेव्हा जे जे शक्य असेल त्या परीने हे ऋण फेडण्याची ताकद ईश्वराने आम्हाला द्यावी माझ्या पत्नीला देखील या घटनेचा सर्वाधिक आनंद झाला त्याचेही मला समाधान आहे – डॉ. अशिष जळक, प्रमुख चैतन्य टेस्ट ट्युब बेबी सेंटर बारामती.
