पुन्हा एकदा बारामतीची कोरोना हेल्पलाईन ठरली हेल्पफुल…
स्थळ : पुण्यातील नामांकित खाजगी हॉस्पिटल…दिवस – आजचाच.. हॉस्पिटलच्या वेटिंग रूममध्ये राज्यातील वरिष्ठ पदावर काम केलेले पोलीस अधिकारी असतात बसलेले.. ते कोरोना पॉझिटिव्ह असतात… ऑक्सिजनची पातळी 75% वर आलेली असते आणि त्यांना आयसीयूचा बेड मात्र उपलब्ध नसतो, विषय पैशाचा नसतोच मुळी… पण पुण्यातील खासगी दवाखान्यात देखील कोरोनाची स्थिती काय आहे हे दर्शवणारे भीषण वास्तव ते अधिकारी डोळ्याने पाहत असतात… नातेवाईकांची घालमेल सुरू असते… अन् अशावेळी त्यांच्या मदतीला धावून येते ती, बारामतीची कोरोना हेल्पलाइन..!!
सलग दुसऱ्या आठवड्यात बारामतीतील कोरोना ग्रस्तांसाठी खरेतर तयार केलेली कोरोनाची हेल्पलाईन, इतरांसाठी देखील कशी मदतीसाठी तत्पर असते याचा नमुना आजही पहावयास मिळाला. या कोरोना हेल्पलाइनमध्ये बारामती शहरातील नामांकित डॉक्टर्स विविध स्वयंसेवी संस्थांचे पदाधिकारी सहभागी आहेत. आज या हेल्पलाईनमधील सदस्य असलेले बालरोगतज्ञ डॉक्टर भास्कर जेधे देशमुख यांना एक फोन आला. फोनवर पलीकडे असलेल्या एका नातेवाईकांनी त्यांना पुण्यामध्ये आयसीयू बेड उपलब्ध करण्याबाबतची विनंती केली.
हे आयसीयू बेड ज्यांच्यासाठी हवे होते ते राज्यातील वरिष्ठ स्तरावर काम केलेले निवृत्त पोलिस अधिकारी होते. दुर्दैवाने ते कोरोना पॉझिटिव्ह आले होते आणि त्यांची ऑक्सिजनची पातळी हळूहळू कमी होत चालली होती. मात्र दवाखान्यात त्यांच्यासाठी बेड उपलब्ध नव्हते. जे अधिकारी याबाबतीत वेटिंगवर होते, आत्तापर्यंत कैक वेळा त्यांच्या एका इशाऱ्यावर अनेक जणांना दवाखान्यामध्ये प्रवेश मिळाला असेल, मात्र पुण्यामध्ये कोरोनाची रुग्णांची आकडेवारी किती प्रचंड आहे व आता मोठा असो की, बडा व्हीआयपी असो, कोरोनाने त्यांच्यापुढे अडचणींचा डोंगर उभा केला आहे, याची प्रचिती या अधिकाऱ्यांना इथेच आली.
बराच काळ त्या दवाखान्याच्या वेटिंग रूममध्ये बसून बेड मिळण्याची प्रतीक्षा करीत असलेल्या या अधिकाऱ्यांची प्राकृतिक स्थिती खालावत चालल्याने नातेवाईकांसह यापूर्वी त्यांच्या मार्गदर्शनाखाली काम केलेल्या पोलीस अधिकाऱ्यांचीही अस्वस्थता वाढली, या अधिकाऱ्यांनीही इतरत्र संपर्क करण्याचा प्रयत्न केला, मात्र सगळीकडे कोरोनाचे रुग्ण असल्याने कोणताच दवाखाना आमच्याकडे एखादी जागा रिकामी आहे असे सांगत नव्हता. अशावेळी नातेवाईकांना बारामती आठवली आणि त्यांनी येथे नक्की समस्या सुटतील असा आशावाद लक्षात घेऊन डॉक्टर जेधे यांना संपर्क साधला होता. डॉक्टर जेधे यांना चार दिवसांपूर्वीच हिवरे बाजार येथील लहान मुलाच्या बाबतीत घडलेली घटना माहीत होती, त्यांनी तातडीने पुन्हा भूलतज्ञ व इंडियन मेडिकल असोसिएशनचे सदस्य डॉक्टर सुजित अडसूळ यांना यामध्ये मदत करण्याची सूचना केली. डॉक्टर अडसूळ यांनी लागलीच संवेदनशीलता ठेवून पुण्यामध्ये संपर्क साधला व वेगवेगळ्या दवाखान्यांमध्ये घेतलेल्या माहिती, पाठपुरावा व विनंतीनंतर भारती हॉस्पिटल मध्ये एक जागा त्यांना मिळाली आणि त्यांनी या अधिकाऱ्यांची तेथे पाठवणी केली. सध्या त्यांच्यावर उपचार सुरू आहेत.
खरंतर तसा विषय फार मोठा नव्हता, मात्र पुणे – मुंबई सारख्या ठिकाणी हजारोंनी रुग्ण वाढत असल्याने तेथे कशी परिस्थिती आहे याची प्रचिती बारामतीकरांना ही या माध्यमातून आली. या माजी पोलिस अधिकाऱ्याला एक बेड तेथे मिळाले, पण भविष्यात खरोखरच पुण्यामध्ये एखाद्या अतिमहत्त्वाच्या व्यक्तीलाही उपचारासाठी प्रतीक्षेतच राहावे लागेल असे संकेत यातून मिळत आहेत. अशावेळी दुसऱ्यांच्या मदतीला धावून जाणार्या बारामतीत यापुढील काळात खूप काळजी घ्यावी लागेल, येथील कोरोनाग्रस्तांची संख्या सातत्याने कमी ठेवून आयसीयू चे बेड कायम रिकामे राहतील, एवढी तरी नक्कीच काळजी घ्यावी लागेल, असाही धडा या घटनेतून मिळाला आणि बारामतीकर सातत्याने लागलीच इतरांच्या मदतीला धावून जातात हा संदेशही यातून मिळाला आहे.
