महान्यूज लाईव्ह विशेष
व्हॉटसएप, फेसबुक लोकांच्या हातात आल्यानंतर आपले मत मांडण्यासाठी त्यांना व्यासपीठ उपलब्ध झाले. मात्र यामुळे कोणताही अभ्यास न करता तज्ञ झालेल्या मंडळींनी संख्या अचानक वाढली आहे. अशा काही तज्ञांची मते आपल्या निखळ करमणूकीसाठी आपल्यापुढे मांडत आहे.
महाराष्ट्र सरकारने विदेशी दारूवरचा अबकारी कर कमी केला यावर एक तज्ञाने आपले मत मांडले आहे. आपला हा लेख दोन वर्तमानमत्रात प्रकाशित झाला असल्याचेही त्याचे म्हणणे आहे. या संपूर्ण लेखात त्याने केलेले दावे असे
१. आदित्य ठाकरे सध्या इंग्लंडमध्ये आहेत, ते पर्यावरण समीटसाठी गेले होते, ती होऊन आठवडाभर झाला तरी ते परतलेले नाहीत. त्यांच्यासोबत वलसा नायर सिंग या अबकारी विभागाच्या प्रधान सचिवही आहेत. याचा या अबकारी दर कमी करण्याशी संबंध असल्याची शंका आहे.
२. ९० टक्के विदेशी व्हिस्की स्कॉच ही इंग्लडमधून आयात होते आणि वरील दोघे इंग्लडमध्येच आहेत.
३. फेब्रुवारी २०२१ मध्ये केंद्रीय वाणिज्यमंत्री पियुष गोयल यांच्यासमोर ब्रिटीश सरकारने हा मुद्दा उपस्थित केला होता, पण त्यांनी त्याला स्पष्टपणे नकार दिला होता.
४. देवेंद्र फडणवीस मुख्यमंत्री असताना त्यांनी विदेशी दारुवर कर वाढविला होता, पण पेट्रोल, डिझेलवर कमी केला होता. आता ठाकरे सरकार नेमके उलटे करते आहे.
५. या निर्णयामुळे राज्यात दारुडे वाढणार.
६. करकपातीचा निर्णय ब्रिटीश कंपन्यांच्या प्रभावाखाली घेतला गेला आहे काय?
यासारखे मुद्दे आहेत. लेखाखाली प्रकाश गाडे असे नाव आहे. अर्थातच संपर्क नंबर नाही.
यातील अनेक मुद्दे सहज खोडून काढण्यासारखे आहेत. पण त्यात पडायचे कारण नाही. केवळ निखळ करमणूक म्हणून याकडे पहायचे.
२००० रुपयाच्या नोटेत तार असणार आहे, त्या तारेमुळे अशा नोटा कुठे आहेत याची माहिती मिळणार आहे, असा जावईशोध याच व्हाटसएप युनिव्हरसिटीव्दारे लागला होता. माझ्यासकट लाखो लोकांच्या त्या परिस्थितीत त्यावर विश्वास बसला होता.
त्यामुळे वरील पोस्टवर विश्वास ठेवणारेही करोडो लोक असतील याच शंका नाही. पण एखाद्याच्या कल्पनाशक्तीला मात्र दाद दिली पाहिजे.
(हा संपुर्ण लेख वाचण्याची तुम्हाला इच्छा झाली असेल तर ९८८१०९८१३८ या व्हाटसएप नंबरवर मेसेज टाका.)
